АҞӘА, нанҳәа 23 - Sputnik. Аԥсны атәылахьчара аминистр Владимир Ануа урыстәылатәи иколлега Сергеи Шоигу ианеишьеит Ахаҵаразы Аԥсны аорден, абри атәы аанацҳауеит РИА Новости.
Ахаҵаразы аорден ианашьо, Владимир Ануа иазгәеиҭеит "Аԥсны Урыстәыла зықәгәыӷуа ҩызаны иҟан, иҟоуп, иагьыҟазаауеит" ҳәа.
"Аԥсныжәлар ахаан иаҳхашҭуам аибашьразтәи аамҭа хьанҭақәа раан шәышҳавагылаз, иара убас акоронавирус аҿагылараҟны иҟашәҵаз ацхыраарагьы. Убри азы иҭабуп ҳәа шәаҳҳәоит, агәрагьы ҳгоит шәареи ҳареи ҳаиашьаратә еизыҟазаашьақәа арегион аҟны аҭынчреи аҭышәынтәалареи шьаҭас ишрымазаауа", - иҳәеит Аԥсны атәылахьчара аминистр.
Урыстәыла атәылахьчара аминистр аԥсуа ган иҟанаҵаз аҳәарала атәыла COVID-19 аҿагылараҟны иацхрааит. 2020 шықәса мшаԥы 17 инаркны агәабзиарахьчара аусбарҭақәа, амҩақәа адезинфекциа рзуразы Аԥсныҟа иаашьҭын 35-ҩык аррамаҵзурауааи арратә техника 13 аки. Урҭ арзҩыдаратә усмҩаԥгатәқәа мҩаԥыргеит Гәдоуҭа, Агәыӡера, Очамчыра, Тҟәарчал, Гал, Гагра ақалақьқәа рҟны.
