АҞӘА, цәыббра 15 – Sputnik. Аԥсуа спортсмен Рустам Амԥар цәыббра 17 рзы Ниу-Иорк имҩаԥысраны иҟоу зых иақәиҭу ақәԥаразы атурнир "Beat the Streets" далахәхоит. Абри атәы аанацҳауеит Аԥсны аспорт азы Аҳәынҭеилакы.
Рустам Амԥар диндаҭлоит ЕАА еизгоу акоманда иреиӷьу ақәԥаҩцәа иреиуоу Џьек Миуллер.
"Акоммерциатә турнирқәа рыбжьара - ари зегь реиҳа иаарылукаартә иҟоу иреиуоуп. Атурнир мҩаԥысуеит Ниу-Иорк амҩадуқәа ирхадоу руак аҿы. Аха сынтәа ахәаԥшцәа рыда имҩаԥгахаргьы алшоит, иҟалоит ахыбра аҩныҵҟа акәхаргьы", - азгәеиҭеит Рустам Амԥар.
Атурнир аҳәаақәа ирҭагӡаны ф-қәгыларак мҩаԥгахоит. Ақәгыларақәа ирылахәхоит ахацәа реиԥш аҳәсагьы.
Рустам Амԥар – жәларбжьаратәи акласс иатәу аспорт азҟаза, Урыстәыла ақәыԥшцәа рыбжьара аиндаҭлара аиааиҩы, Европеи адунеии рҟны ақәыԥшцәа рыбжьара аиндаҭлара апризиор, адунеи Ахраҿа занашьоу, Иван Иарыгин ихьӡ зху аиндаҭлараҿы Гран-при занашьоу.
