АҞӘА, абҵара 18 - Sputnik. COVID-19 зцәа иалаз 1947 шықәсазы ииз апациент иԥсаҭазаара далҵит абҵара 19 рзы, абри атәы аанацҳауеит Ауааԥсыра COVID-19 рацәыхьчаразы аоперативтә штаб.
Ахаҵа ахәышәтәырҭаҿы ахәышәтәра дахысуан абҵара 11 раахыс. Иақәнагаз атерапиа шыизымҩаԥыргозгьы, иҭагылазаашьа бааԥсхеит.
Иҳаҩсыз уахыки-ҽнаки рыла COVID-19 рылоу ирыламу аилкааразы 155-ҩык атестқәа рзыҟаҵан, урҭ рахьтә 39-ҩык акоронавирус рцәа ишалаз аадырԥшит.
Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 78-ҩык ауааԥсыра, урҭ рахьтә 68-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 27-ҩык, ибжьаратәуп - 22-ҩык, илҩаауп хәҩык апациентцәа.
Аҟәатәи аинфекциатә хәышәтәырҭаҿы ирхәышәтәуеит 28-ҩык апациентцәа, хҩык рҭагылазаашьа бааԥсуп.
Аҟәа асасааирҭа "Аиҭар" иахьаҵанакуа иаадыртыз амобилтә госпиталь аҟны ишьҭоуп акоронавирус зыдбалоу 35-ҩык апациентцәа. 30-ҩык рҭагылазаашьа бжьаратәуп ҳәа иԥхьаӡоуп, хәҩык рҭагылазаашьа бааԥсуп.
Акоронавирус иазку ажәабжьқәа зегьы шәрыԥхьар ҟалоит абра>>
