АҞӘА, цәыббра 16 — Sputnik, Асҭанда Арӡынԥҳа. Аԥсны Аҳәынҭқарра Ахада Рауль Ҳаџьымба Иқәҵара инақәыршәаны Аԥсны ахортә капелла "Ахьӡ-аԥша" аорден III-тәи аҩаӡара анашьоуп. Абри атәы ҳалҳәеит Аԥсны Акультура аминистр Ельвира Арсалиаԥҳа, аҩашаҽны, цәыббра 15 рзы, акапелла аиубилеитә концерт алагамҭазы.
Аԥсны Аҳәынҭқарра Ахада Рауль Ҳаџьымба Иқәҵара инақәыршәаны, акультурахь рлагаламҭақәа рзы Аԥсны зҽаԥсазтәыз артист ҳәа ахьӡ ду рыхҵоуп Лучиа Џьениаԥҳа, Виолетта Капица, Асида Шьакаиаԥҳа, Родик Ҳагба.
Сара Анқәабԥҳа илыхҵоуп ахьӡ — Аԥсны акультура зҽаԥсазтәыз аусзуҩ, ареспублика ахортә капелла асолист Аслан Камлиа – Аԥсны жәлар рартист.
Аҳәынҭқарратә хортә капелла аиубилеи — атәыла акультуратә ԥсҭазаараҟны иналукааша хҭысуп, лҳәеит Арсалиаԥҳа.
"Акапелла атәыла ианаҭеит ахьӡ ҳаракқәа. Амузыка аусзуҩцәа реиҳараҩык аамҭак-аамҭак азы абри аколлектив аҟны аус рымукәа иҟам. Акапелла анапхгаҩцәа ракәзар ареспублика амузыкатә культурахь рлагала ахә ашьара уадаҩуп", — лҳәеит аминистр.
Иахьа акапелла анапхгаҩыс иҟоу Нора Џьынџьалԥҳа илыллыршеит еиҳа иуадаҩыз аамҭақәа рзы аколлектив аиқәырхара, ҳәа азгәалҭеит лара.
"Еиҳа-еиҳа ирацәахоит аколлектив имҩаԥнаго агастрольтә ныҟәарақәа, урҭ адунеи аҟны имҩаԥысуа амузыкатә фестивальқәа раӷьырак ирылахәуп", — ацылҵеит аминистр.
Аҳәынҭқарратә хортә капелла аԥҵан Аҟәатәи амузыкатә училишьче аҟны иҟаз аоператә студиа шьаҭас иаҭаны, аучилишьче адиректор Алықьса Чычба ицхыраарала. Еиуеиԥшым аамҭақәа рзы иара анапхгара арҭон Ражьден Гәымба, Алықьса Чычба, Вадим Судаков, Виачеслав Аиба, Нодар Ҷанба.
1996 шықәса инаркны иахьанӡа акапелла анапхгаҩыси дирижиор хадаси дыҟоуп Аԥсны жәлар рартистка Нора Џьынџьалԥҳа.
