Рашәара 9 рзы архивқәа Жәларбжьаратәи рымш азгәарҭоит.
"Аибашьраан ааха ӷәӷәа ҳаҭан. Аиаша уҳәозар, 90 процент инацны адокументқәа блын. Урҭ даҽаџьара иаҳзыԥшаауам, избанзар рыхҩылаақәа ыҟамызт. Аха иазгәаҭатәуп, асовет аамҭазы иаҳа хәы змоу ҳәа иԥхьаӡаз архиваҿы аматериалқәа афотопленкахь ишиаргоз. Убарҭ рҟынтәи хәыҷқәак ҳзаанхеит. Аха урҭ ҳрыԥхьартә алшара ҳамамызт. Зыхә дуу амаруга, иара убас аспециалистцәа адԥхьалатәын. Шықәсык аҟара ҵоит Чехиатәи аҟазацәа ацхыраара ҳарҭеижьҭеи, амаруга анаҩсгьы ҩыџьа ҳастудентцәа уи аус адулашьа ддырҵеит. Ҳгәыӷуеит ҩбаҟа шықәса рнаҩс иҳамоу апленкақәа рҟынтәи аматериалқәа ҳауеит ҳәа", — азгәеиҭеит Еныкь.
Аԥсны Аџьынџьтәылатә еибашьраан жьҭаара 22, 1992 шықәсазы ақырҭуа мпыҵахалаҩцәа Аҳәынҭқарратә архив рыблит.
