"Асценаҿы аԥсшәа аҟамзаара мзыс иамоу убри ауп, КВН ахәаԥшра иааиуа рҟнытә имаҷуп аԥсуа бызшәа еилызкаауа, Аԥсны иқәынхо егьырҭ амилаҭқәа ртәы ҳамҳәозаргьы, ҳара аԥсуаа ҳҟынтә ирацәаҩуп абызшәа змаҳауа. Ҳақәгылараҿы аԥсшәа еиҳахар, КВН ахәаԥшра иаҟәыҵуеит, убри аҟнытә аурыс бызшәа асценаҿы еиҳа аԥыжәара амоуп", - азгәеиҭеит Цкәуа.
Михаил иҳәеит апремиер-лигаҿы ишыҟоу зыҩаӡара ҳараку, Урыстәыла алигақәа рахь инеир зылшо агәыԥқәа.
"Анаҩстәи асезон азы ҳгәы иҭоуп гәыԥк еизганы Урыстәылаҟа ашьҭра, Аԥсны аӡбахә гартә еиԥш. Еизгоу акоманда аԥҵаразы иҳамоуп аҷкәынцәеи аӡӷабцәеи, аха макьана ҳтәыла аҩнуҵҟа рԥышәа еиздырҳалоит. Агәыԥқәа рҟазара, рбаҩхатәра есааира иацлоит, уи умбар залшом", - азгәеиҭеит Цкәуа.
Мшаԥымза 1 азы Аԥснытәи аҳәынҭқарратә филармониаҿы имҩаԥысран иҟоуп КВН аԥсуа премиер-лига афиналтә хәмарра.
Инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.
