"Апроект ҳаналагоз ауадаҩрақәа даара ирацәан, ҳаиҿкаара маҷуп ҳәа ҳгәы анкаҳауазгьы ыҟан, аха иҳадгылаз рыбзоурала иалыршахеит. Ахыркәшаратә концерт аҟны иаҳбеит ҳџьабаа шаҳԥылаз, ахәыҷқәа ргәыӷрақәа шынаӡаз", - ҳәа азгәалҭеит Чагәааԥҳа.
Инеиҵыху аиҿцәажәара шәазыӡырҩы арадио Sputnik Аԥсны аефир аҟны.
Амузыкатә еиндаҭлара "Орфеи" афинал мҩаԥысит Очамчыра рашәара 20 рзы.
Иреиҳау аԥхьахә - атәыла ахада иҟынтәи Агран-при - ланашьахеит Ҷлоутәи аҭыԥҳа Викториа Миқааԥҳа.
Апроект афинал ахь инеит 15-ҩык анагӡаҩцәа. Аиндаҭлара алахәылацәа реиԥш асценахь инеит аԥсуа естрада ашәаҳәаҩцәа, апроект аԥшьызгаз Валериа Адлеиԥҳа.
Авокалтә еиндаҭлара "Орфеи" хацыркын Очамчыра, ԥхынҷкәын 5 рзы. Аиндаҭлара хықәкыс иаман ашәаҳәаҩцәа қәыԥшцәа апрофессионалтә сценахь рнагара, аиҳаракгьы ақыҭаҟынтәи ахәыҷқәа.
