Арадио Sputnik Аԥсны арубрика "Ҳраионқәа рыԥсҭазаара" аҳәаақәа ирҭагӡаны, амҩаԥгаҩцәа есыҽны еилыркаалоит араионқәа рҿы ақыҭанхамҩеи, акультуреи, аҵарадырреи, аспорти рҟны иҟоу аихьӡарақәеи, аҿыцрақәеи, раԥхьаҟатәи рыгәҭакқәеи ртәы. Гәылрыԥшь араион иамшны иазгәаҭоуп аҩаша.
"2015 шықәса рзы "Спартак" ҳәа ашьапылампылтә команда аԥҵан, уи ацхыраара аиҭон Роман Китариев. Ҩышықәса рышьҭахь акоманда еилыбгеит, избанзар, уаҳа ацхыраара амаиут. Иреиҳау алигаҿы ихәмаруеит ашьапылампыл асыҩ дуцәа, урҭ еснагь финансла еиқәшәазароуп, аха ус еиԥш акоманда ҳазныҟәымгеит. Убри аҟнытә Аԥсны Ачемпионатгьы ҳалахәӡам. Анаҩс иӡбан ахәыҷтәы команда азыҟаҵара. Иахьазы иҳамоуп х-гәыԥк, 40-ҩык ахәыҷқәа ари аспорт хкы иазкуп. Ҩ-командак ацхыраара арҭоит аспорт азы араионтә еилакы, егьы араион аҿы иҟоу аспорттә комплекс. Ахәыҷқәа знык Аԥсны анҭыҵ иқәымгылацт, аҭаацәагьы аҳәынҭқаррагьы ус еиԥш алшара рымам. Ахәыҷқәа изҿу аус ргәы ақәԥымҵәарцаз ацхыраара роуроуп, дара изҿыԥшышагьы ыҟазароуп. Ахәыҷтәы шьапылампыл шаҭаху еиԥш адуцәа ркомандагьы аҭахуп", - ҳәа азгәеиҭеит Какәыбаа.
Инеиҵыху аиҿцәажәара шәазыӡырҩы арадио Sputnik Аԥсны аефир аҿы.
