"Аҳауатә ҭагылазаашьа Тҟәарчал угәы шьҭызхуа акәны иҟоуп. Асоура иалагеит иаха асааҭ 8 рзы, аха иара бааӡан. Ашьыжьымҭан асааҭ быжьба шыҟаз асба аура иалагеит. Уи ауп изышьҭагылазгьы. Ҿыгҳарала жәабаҟа сантиметр иҟоуп. Ҳәарада, ашьха иазааигәоу аҭыԥқәа рҿы иаҳа ирацәаны ишьҭоуп акалақь аҩнуҵҟа аасҭа. Ақалақь аҿы амашьынақәа ныҟәоит аҟнытә, ишьҭалазгьы рыԥсаҟьеит. Амашьынақәа зымныҟәартә еиԥш аҭагылазаашьа ыҟаӡам, аха ашьыжь инаркны ақалақь аҿы алашара ыҟам, убри ҳгәы еихьнашьуеит. Ауааԥсыра адәы иқәуп, афотосахьақәа ҟарҵоит. Ирацәаҩуп асы рбарцаз Аҟәантә иаазгьы. Зегьы асы иашьҭалан Риҵаҟа ацара иашьцылеит, аха Тҟәарчалгьы иубаша рацәоуп. Ақалақь ауааԥсыра абасала иахьазы ныҳәак рымазшәа ргәалаҟазаара ыҟоуп. Асы гәхьааргон. Ҩышықәса ҵуеит ара асы амуижьҭеи, уажәазы ргәахәтәы наӡеит", - ҳәа еиҭеиҳәеит Кәарҷиа.
Инеиҵыху аиҿцәажәара шәазыӡырҩы арадио Sputnik Аԥсны аефир аҿы.
