"Оқәым ашкол аартразы иџьабаа дуӡӡоуп аԥшьаҩы Давид Маҷавариани. Усҟантәи аамҭазы иара аҵара ду змаз иакәны дыҟан. Ашкол ахь иааиуаз ахәыҷқәа рықәра ахыԥан иҟан, 8, 9, 10 шықәса зхыҵуаз ракәын, урҭ рыдагьы иҟан 20 шықәса зхыҵуазгьы. Дара хықәкыла иҟарҵоз, ауахәама иадҳәаланы ақьырсианра Аԥсны аларҵәара акәын. Иара аԥсуа школ ахьӡын, аха арҵара урыс бызшәала акәын ишымҩаԥысуаз. Ахәыҷқәа хәба-быжьба километр иахысны иаауан ашкол ахь. Маҷавариани аԥхьара, аҩра дирҵон. Аурыс классикатә ҩымҭақәа дирдыруан аҟынтә, ахәыҷқәа аинтерес рыман. Араҟа иҟан ацқьаҩыра. Усҟан алҩақ ԥшааны, убри ирӡыҭны, аҟыз амҵәыжәҩа ахыӡқәа рыла, ақьаад ҽыҭқәак ршьамхы иқәкны ауп ишыҩуаз. Хыбрасгьы ирымаз қьалак аҳасабала акәын ишыҟаз, аҭырас ақәҵаны. Уаҩы иџьеишьаратәы иҟоуп аҭагылазаашьа. Усҟантәи аамҭазы уа аԥсуаа рацәаҩын, анаҩс ашьҭахь агырқәа иаҳа ирацәахеит", - еиҭеиҳәеит аҵарауаҩ.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
