АҞӘА, хәажәкыра 26 — Sputnik, Анжелика Бениаԥҳа. Хәажәкыра 25 рзы Ростов имҩаԥысуаз ашәарыцалақәа рцәыргақәҵа "Гордость Юга" Аԥснытәқәагьы рылахәхеит ҳәа ааицҳаит ашәарыцаҩ Шамиль Бигәаа.
Иара иажәақәа рыла ацәыргақәҵа ахықәкы иреиӷьу ашәарыца-ла хкқәа ралыԥшаареи ашәарыцацәа реилазаара алахәылацәа реинырреи роуп. Ацәыргақәҵа иалахәхоит 10-мз инаркны 10-шықәса рҟынӡа зхыҵуа алақәа. Аԥснынтәи ацәыргақәҵахь ицоит хҩык ашәарыцацәеи алақәа аабеи.
Шамиль иакәзар уахь инеигоит англиатәи апоинтер жәла иаҵанакуа Босси Золлии.
Аԥснытәи ашәарыцаҩцәа асеиԥш иҟоу ауснагӡатәқәа рылахәра еснагь рҽазыршәоит. Убас, 2010 шықәса рзы англиатәи асеттерқәа рыжәла ашьаҭаркра 120-шықәса ахыҵра ацеремониа иалахәын. Акомандатә зшьаҿы актәи аҭыԥ ааныркылеит.
"Асовет еидгыла ианаамҭаз иреиӷьу англиатәи асеттерқәа Аԥсны ауп иахьыҟоу ҳәа ишьан. 90% ҳлақәа шәарыцоит, итәам", — иҳәеит Шамиль Бигәаа.
Ацәыргақәҵаҿы алахәылацәа рыбжьара иаарту ачемпионат еиԥш имҩаԥыргоит акомандабжьаратә еицлабрақәагьы.
Ашәарыцалақәа зхатәу рлақәа рӡыргара адагьы дара даргьы еиныруеит, рԥышәа еимырдоит, акинологцәа рҟынтәи абжьагарақәа роуеит.
Ацәыргақәҵа мҩаԥнагоит алааӡара аклуб арегионалтә уаажәларратә еиҿкаара "Виват".
