АҞӘА, хәажәкыра 12 – Sputnik. 2020 шықәсазтәи ЕАА аҳәынҭқарратә биуџьет апроект иазыԥхьагәанаҭоит 500 миллион доллар урыстәылатәи анырра аҿагыларазы ҳәа аанацҳауеит РИА Новости.
"Абиуџьет аҿы иазыԥхьагәаҭоуп 500 миллион доллар, Европа, Евразиа, ацентртә Америка рзы: азеиԥш шәарҭадара аиҿкааразы, ЕАА адгылаҩцәа рҵакырадгьыл акзаара ахьчаразы, атәыла-партниорцәа рҽазышәарақәа рыдгыларазы, амакроекономикатә ҵакыраҿ аԥсыҽрақәа (аенергетика, ахәаахәҭра) азхьаԥшра рыҭаразы", - ҳәа аҳәоит адокумент аҿы.
Абарҭ ахәҭақәа еизызкуа аҟәша хыс иамоуп: "Урыстәыла гәаӷшақәтәи анырра аҿагылара".
Атәылахьчараз Аҳәынҭқарратә дума аилак ахантәаҩы ихаҭыԥуаҩ Иури Швыткин аҳәамҭа ҟаиҵеит ЕАА 2020 шықәсазтәи атәылахьчаратә биуџьет агрессиатә ҟазшьа амоуп ҳәа.
"Абри абиуџьет апроект адунеитә еилазаара зегьы рзы ашәарҭара аҵоуп, агрессиатә ҟазшьа амоуп. Ҳәарада, раԥхьа иргыланы Урыстәылеи Китаии рҿагылароуп иззырхо", - ҳәа иҳәоит Швыткин.
Уаанӡа Аҩны шкәакәа ахаҭарнак ажурналистцәа рзы аҳәамҭа ҟаиҵахьан ЕАА ахадара 2020 шықәсазтәи абиуџьет апроект ала атәылахьчаразы аныхрақәа 5% рҟынӡа (750 миллиард доллар) иазырҳазарц ажәалагала ҟанаҵеит ҳәа.
