АҞӘА, абҵ 11 – Sputnik. Аԥсуа спортсменцәа жәларбжьаратәи аицлабрақәа рҿы Аԥсны абираҟ аҵаҟа рықәгылара азҵаара шьҭыхын зхы иақәиҭу ақәԥарала Европа ачемпионцәа ркубок иалагӡаны имҩаԥгаз аконференциаҿы.
Аконференциахь ааԥхьара иҭан Аԥсны аԥыза-министр Беслан Быҭәба. Уаҟа ирылацәажәан Аԥсны аспортсменцәа рыстатус иадҳәалоу азҵаара, урҭ Аԥсны абираҟ аҵаҟа жәларбжьаратәи аицлабрақәа рҿы рықәгылара алыршара мҩақәас иамоу ирзааҭгылан. Иара убас, Ешыратәи аспорттә база аиҭашьақәыргылареи, уаҟа жәларбжьаратәи аицлабрақәа рымҩаԥгареи азҵаара иалацәажәан.
Ас еиԥш иҟоу анаҩстәи аконференциа мҩаԥгахоит Аҟәа абҵарамза анҵәамҭазы.
