АҞӘА, абҵ 14 – Sputnik. Донецк иҭархаз малаизиатәи аҳаирплан Boeing аԥҽыхақәа ралгаразы аԥкаанҵа Голландиа макьана иаҵанамҩыцт. Уи ахҟьоит уаҟа иазхаҵам Донецктәи Жәлар Республика аӡбахә ахьҳәоу. Аԥкаанҵа аҵаҩра алыршахар ауеит Малаизиа ари апроцесс аҽаналанархәлак ашьҭахь, иҳәеит ДЖӘР атранспорт Аминистр Семен Кузменко.
"Сгәы иаанагоит, урҭ аԥкаанҵа рнапы аҵарҩып ҳәа, малаизиатәи аган анрықәыӷәӷәалак ашьҭахь. Избанзар Голландиатәи аспециалистцәа аҭакԥхықәра рыдуп иҭахаз рыбаҩи аҳаирплан аԥҽыхақәеи реизгаразы", — иҳәеит Кузменко.
Ареис Амстердам – Куалу-Лумпур ҭархан ԥхынгәы 17 Донецк ааигәара. Аҳаирплан иҭан 298-ҩык ауаа, урҭ зегь ҭахеит. Киевтәи анапхгара ахара рыднаҵеит Донецк зыхьчо амчқәа. Аха Донецк ахьчацәа ирҳәеит аҳаирплан ҭазырхаша абџьар шрымам.
