АҞӘА, ԥхҷ 30 – Sputnik, Анастасиа Никонова, Саид Барганџьиа. Ҳаамҭазтәи акинотеатри аҿар-рылахҿыхратә центрқәеи раартра – ҳсиаҿы ажәабатәи аҭыԥ иаԥсахеит.
Ажәбатәи аҭыԥ — аԥсуа спортсменцәа иҿыцу аиааира дуқәа ргара.
Аҟәа ауааԥсыра азыԥшуп иара убас ҳазҭало ашықәсазы Аԥсны иаҭаауа аԥсшьаҩцәа рхыԥхьаӡара иазҳап ҳәа, аурыс мааҭ акаҳареи аҳәаанырцәа аԥсшьара ахарџь иақәырӡтәу ахьеиҳахои инарыдҳәаланы – аабатәи аҭыԥ.
Урыстәылеи Евро-еидгылеи рыбжьара асанкциақәа раԥыхрагьы ҳреитинг аҟны абыжьбатәи аҭыԥ ааннакылоит.
Афбатәи аҭыԥ – Украина иҟоу аполитикатә кризис аҟны аиӷьхарақәак рыҟалара.
Аԥсны акультуратә ԥсҭазаараҿ ахҭысқәа, хаҭалагьы атеатрқәа рҟны ақәгылара ҿыцқәа, насгьы зыхьӡ нагоу амузыкантцәа Аԥсны рықәгылара иазыԥшуп изызҵааз Аҟәа ауааԥсыра рыбжаҩык – ахәбатәи аҭып.
Иззыԥшу ак акәны иҟоуп Аԥсныи Урыстәылеи рыбжьара «Аиҩызареи астратегиатә еицхыраареи рзы» аиқәшаҳаҭра аусура алагара – аԥшьбатәи аҭыԥ.
Владислав Арӡынба ихьӡ зху Аҟәатәи аҳаирбаӷәаза аартра иазыԥшуп ҳаицтәылауаа аӡәырҩы – ахԥатәи аҭыԥ.
Агәабзиараахьчара амаҵзура аиӷьхара иазыԥшу рхыԥхьаӡара акыр ирацәаҩуп – аҩбатәи аҭыԥ.
Аха зегь реиҳа ҳауаажәлар ззыԥшу – ауалафахәи, атәаначахәи, асоциалтә цхыраагӡақәеи рыцлара ауп. Ари апозициа ианнакылоит актәи аҭыԥ.
