АҞӘА, жьҭ 10 – Sputnik, Анастасиа Никонова. Гьаргь Ацқьа иуахәама амҽышатәи ашкол ахәыҷқәеи, ауахәама аусзуҩцәеи аволонтиорцәеи Аҟәатәи аҩны-интернат аҿы иҟоу абыргцәеи ахамыхәацәеи Ашықәс ҿыц рыдырныҳәалеит.
"Иҳақәиҭу иуасиаҭны ауаа ирзынижьит ачымазаҩцәа рҭаара, зхы иамыхәо рыцхраара. Сара сзы акраҵанакуеит ас еиԥш иҟоу агәыҳалалра зцу аусқәа рыҽрылархәра", — лҳәеит аконцерт аиҿкааҩ Мариа Недиак.
Ари раԥхьатәи ныҳәатә усмҩаԥгатәуп ҳазҭалаз ашықәс азы абыргцәеи ахамыхәацәеи Аҟәатәи рыҩны-интернат аҟны еиҿкаау.
"Абыргцәа акгьы рыгым аицәажәара ада. Урҭ еснагь асас имҩахыҵра иазԥшуп, акыргьы еигәырӷьоит аӡә данырзааиуа", — лҳәеит абыргцәа рыҩны аиҳабы Анна Кәарҷиаԥҳа.
Аныҳәатә программа адгылара арҭеит Урыстәыла аволонтиортә еиҿкаара "Старость в радость". Урҭ Аԥсныҟа иаарышьҭит аныҳәатә ҳамҭақәа. Иара убас, аныҳәа амҩаԥгара иацхрааит Аҟәа ахадара.
Абыргцәеи ахамыхәацәеи Аҟәатәи рыҩны-интернат аҟны инхоит 50-ҩык ауаа.
