АҞӘА, жәб 4 – Sputnik, Анжелика Бениа. Самсон Ҷанба ихьӡ зху Аԥсуа аҳәынҭқарратә драматә театр асцена хадаҟны актиор ҿарацәа рыпремиера мҩаԥысит, ахәаԥшцәа идырбан акыр азҿлымҳара ду зцу, апрозаик, адраматург Шоҭа Ҷкадуа иҩымҭа "Ҳаԥсыуаауп, ҳаԥсыуаа" ("Акьанџьа").
Аҿар ртеатр асахьаркыратә напхгаҩы Софа Агәмаа лажәакәа рыла асцена ду аартра акыр аамҭа иизыԥшыз ак акәын.
"Уажәшьҭа лассы-лассы ҳажәбалоит. Аҿыц ақәыргыларақәа рыла шәыршанхареи шәыргәырӷьареи ҳҽазаҳшәалоит. Иахьа иҳамоуп акыраамҭа ҳаззыԥшыз асцена ду", — лҳәеит Агәмаа.
Аспектакль раԥхьаӡакәны иқәиргылеит арежессиор Дырмит Кәартаа, ароль хада наигӡон Амиран Ҭаниа. Апиеса ахаҭа акәзар, аԥсуа ҭаацәаратә еизыҟазаашьақәеи, аҭаацәараҿы имҩаԥысуа ауадаҩрақәеи ирызкуп.
Аԥсуа ҳәынҭқарратә аҿар ртеатр аԥҵан 2014 шықәсазы. Атеатр аилазаараҿы ихәмаруа актеорцәа Аԥснытәи Аҳәынҭқарратә университет афилологиатә факультет "актиортә ҟазара" аҟәша аушьҭымҭацәа роуп, дара аус руан атеатр "Аамҭа" аҟны.
