АҞӘА, жәб 17 – Sputnik, Бадраҟ Аҩӡба. Авиза аиура ырмариахоит аҳәаанырцәтәи Аԥсныҟа ҽнак ҳәа иаауа аԥсшьацәа рзы. Абри атәы Sputnik акорреспондент иеиҳәеит Акурортқәеи атуризми рзы Аҳәынҭқарратә еилакыахада ихаҭыԥуаҩ инапынҵақәа назыгӡо Асҭамыр Ахба.
"Шәача имҩаԥгаз аолимпиада ашьҭахь, адунеи зегь аҟынтәи ауааԥсыра рацәаны Шәача иаҭаауа иалагеит аолимпиатә ргыларақәа лабҿаба ирбарц азы. Адыррақәа иҳамоу рыла, сынтәа Китаинтәи Шәача иаҭаараны иҟоуп миллионки бжаки рҟынӡа ауааԥсыра. Урҭ рахьтә Аԥсныҟагьы аара зҭаху маҷым", — иҳәеит Ахба.
Асҭамыр Ахба иара убас иазгәеиҭеит Акурортқәеи атуризми рзы Аҳәынҭқарратә еилакы ашҟа Шәачатәи атуристтә еиҿкаарақәа рахь ажәалагала шыҟарҵаз аҳәаанырцәтәи аԥсшьацәа Аԥсныҟа раараан авизақәа рыҭара апроцесс армариаразы.
Ахба иара убас иҳәеит аԥсшьацәа рхыԥхьаӡара аизырҳаразы Аминистрцәа Реилазаараҿы авизақәа рыхәԥса армаҷра азҵааразгьы аӡбара шымҩаԥысуа.
Авизадатә режим Аԥсны иамоуп ҳтәыла азхазҵаз аҳәынҭқаррақәеи Ихьыԥшым аҳәынҭқаррақәа реидгыла иалоуи. Егьырҭ атәылақәа зегь рҟынтә Аԥсныҟа иаауа ауааԥсыра зегьы авиза хадырҭәаауеит.
