ГӘДОУҬА, хәжәк 5 – Sputnik, Бадраҟ Аҩӡба. Хара имгакәа Аԥсны Жәлар Реизарахь инашьҭхоит азакәанԥҵаратә жәалагала Риҵеи, Афонтҿыцәи аҳаԥи идырҳауа аԥара ахәҭак Гәдоуҭа араион ацхыраарахь ашьҭразы, иҳәеит Аԥсны ахада Рауль Ҳаџьымба Гәдоуҭа ауаажәлар рԥылараан.
"Ари аинициатива инақәыршәаны, Риҵатәи аҳәырԥсарра аҟны ирҭиуа абилеҭқәа рҟынтә шә-мааҭк Гәдоуҭа араион абиуџьет ашҟа ишьҭхоит, Афонҿыцтәи аҳаԥы аҟынтәи 50 мааҭ, даҽа уи аҟара Афон Ҿыц абиуџьет ахь", — азгәеиҭеит Ҳаџьымба.
Аҳәынҭқарра ахада инаҵшьны иазгәеиҭеит атәыла анапхгара Гәдоуҭа араион ацхыраара шарҭало.
"154 миллион мааҭ ҳашьҭуеит Гәдоуҭа араион аҵарадырра ашҟа. Ҳгәы иҭоуп Гәдоуҭатәи абжьаратә школ № 3-еи, Лыхнытәи абжьаратә школи реиҭашьақәыргылара", — иҳәеит Ҳаџьымба.
Рауль Ҳаџьымба иара убас иазгәеиҭеит Гәдоуҭа араион аҟны еиуеиԥшым анаплакқәа русура анагӡаразы иаҭаху алицензиақәа рыла ишеиқәшәам, уи алагьы ашәахтә ашәара рхы шацәырго. Ари аҭагылазаашьа ааха ӷәӷәа анаҭоит араион абиуџьет, иҳәеит аҳәынҭқарра ахада.
Рауль Ҳаџьымбеи Гәдоуҭа араион ауааԥсыреи реиԥылара иалахәын араион ахада Руслан Ладариа, Жәлар Реизара ахантәаҩы Валери Бганба, Ахада иусбарҭа аиҳабы Асҭамыр Ҭаниа, ахада иҟны еиҿкау аексперртә хеилак аиҳабы Иракли Хынҭәба, араионтә еизара адепутатцәа.
