АҞӘА, хәжәк 12 – Sputnik. Аԥсны Аҳәынҭқарра Ахада Рауль Ҳаџьымба иааиуа амчыбжь азы Адыгатәыла даҭаауеит, уаҟа аҩ-тәылак реиҩызареи русеицуреи рзы аиқәшаҳаҭра напаҵаиҩуеит. Абри атәы РИА Новости иаанацҳауеит, Адыгатәыла Ахада Аслан Тхакушинов иажәақәа рыла.
Адыгатәыла ахадара Рауль Ҳаџьымба ртәыла данаҭаауа арыцхә макьана ирыздырӡом.
Аслан Тхакушинов асоциалтә каҭа Facebook адаҟьаҟны ишаниҵаз ала, Аԥсны Ахада Рауль Ҳаџьымба иахь ааԥхьаратә шәҟәы наишьҭит. Ҳаџьымба Аҳәынҭқарра Ахада иаҳасаб ала раԥхьаӡа акәны Адыгатәыла даҭаауеит, ҳәа ациҵеит Тхакушинов.
Аԥсни Адыгатәылеи ажәларқәа "азеиԥш ҭоурыхи аешьаратә еимадара ӷәӷәеи" рымоуп, ҳәа азгәеиҭеит Тхакушинов. Иара иажәақәа рыла, аҩ-ҳәынҭқаррак излацәажәаша ирыӡбыша азеиԥштә темақәа рацәаны ирымоуп.
Адыгатәыла Ахада иааицҳаит Рауль Ҳаџьымба иаара иадҳәаланы апрограмма ду азыҟаҵара ишаҿу.
