АҞӘА, хәжәк 12 — Sputnik, Наала Аҩӡԥҳа. Сириатәи арепатриантцәа аԥсныжәлар иманшәаланы ирыланхоит иҳәеит аинформациатә агентра "Россия сегодня" еиҿнакааз апресс-конференциа аҟны Аԥсны адәныҟатәи аусқәа рминистр Виачеслав Чрыгба.
"Иахьатәи аамҭазы зегьы нхарҭаҭыԥла еиқәыршәоуп, аусура рзыԥшаатәуп. Еиҳарак урҭ Дамаскнтәи иааз арепатриантцәа роуп", – иҳәеит Чрыгба.
Адәныҟатәи аусқәа рминитср иазгәеиҭеит, урҭ аҵара змоу ауаа шракәу, рхыԥхьаӡараҟны ишыҟоу аҳақьымцәеи, архитекторцәеи, аҵарауааи. Чрыгба излаиҳәо ала, Аԥсны иахәаша уаауп, "рхатә ԥышәеи рдыррақәеи Аԥсны аҿиаразы акыр ихәарҭоуп".
"Аԥсны анхара иашьцылап ҳәа сгәыӷуеит. Ҳара ҳганахь ала рынхаразы аҭагылазаашьа бзиақәа раԥҵара ҳаҿуп", – иҳәеит аминистр.
Ҩы-шықәса раԥхьа Аԥсны адәныҟатәи аусқәа рминистрреи Аԥсадгьыл ахь архынҳәразы акомитети еицхырааны имҩаԥыргаз агәыҳаларатә акциа аҳәаа иҭагӡаны Аԥсныҟа Сириантә иааган 500-ҩык аԥсуааи адыгааи.
