АҞӘА, хәжәк 24 – Sputnik. Анастасиа Никонова. Адыгатәылантәи зхатә гәаԥхарала иааз аибашьҩы Сергеи Диколенко иҭаацәа аԥсшәа раҳәо Ахада иазгәеиҭеит аибашьцәа рыхьӡқәа кашәара рықәым ҳәа.
"Аибашьра ҽазны ишыҟамло сақәгәыӷуеит, ҳҿар аҭынч ԥсҭазаара рыманы аҳәынҭқарра дыргылалароуп", – иациҵеит Ҳаџьымба.
Ахада аибашьҩы иан Галина Диколенко "Агәымшәаразы" амедаль адубликат лиркит.
Сергеи Диколенко амедаль ианашьаразы акәҵара 1995 шықәсазы Аԥсны раԥхьатәи Ахада Владислав Арӡынба инапы аҵаиҩит, аха иахьа-уажәраанӡа идырӡам хабарда ибжьаӡыз иҭаацәа изрыҭамыз атәы.
Агенетикатә анализ аҟаҵаразы, хәажәкыра 23 рзы Сергеи Диколенко иан лҟынтә абиоматериал ган, Ахьӡ-Аԥша абаҳчаҟны ижу аибашьцәа рҟынтә ихаҭара ашьақәыргылара рылшозар ҳәа.
Иҭахаз аибашьцәа рыԥсыбаҩқәа Ахьӡ-Аԥша апарк аҟны аексгумациа рызун 2012 шықәсазы. Иахьатәи аамҭазы 21-ҩык рхаҭарақәа шьақәыргылоуп.
