Ҟабардатәи апоет Зарина Ҟаныҟәа лырҿиаратә хәылԥазы Аҟәа имҩаԥысит

© Sputnik Томас ТхайцукТворческий вечер Зарины Каноковой. Фото с места события.
Творческий вечер Зарины Каноковой. Фото с места события. - Sputnik Аҧсны
Анапаҵаҩра
НовостиTelegram
Абаҩхатәра ҷыда злоу Ҟабардатәи апоетесса Зарина Ҟаныҟәа ажәеинраалақәа реизгақәа хәба дравторуп.

АҞӘА, хәжәк 25, — Sputnik, Анжелика Бениаԥҳа. Ҟабардатәи апоетесса, ажурналист, адраматург Зарина Ҟаныҟәа лырҿиаратә хәылԥазы Аҟәа  Афырхаҵареи ахьӡ-аԥшеи рҳәынҭқарратә музеи аҟны имҩаԥысит.

Зарина Ҟаныҟәа иазгәалҭеит аиашьаратә жәларқәа реизыҟазаашьаҿы даҽа даҟьак шаатуа, уи аазыртуагьы аҿар шракәу.

"Азал аҟны еизаз зегьы рыхьӡ аҳәара салагар акыраамҭа садхалон. Аԥсны аҟазаара иалагӡаны зегь реиҳа иуадаҩуп иаҳбар, ҳзацәажәар ҳҭаху зегь аамҭа рзыԥшаара. Убри аҟнытә сажәеинраалақәа рыла зегьы срацәажәартә еиԥш алшара соуит", — лҳәеит Зарина Ҟаныҟәа.

Зарина Ҟаныҟәа арҿиаратә хәылԥазы аиҿкааҩцәа зегьы иҭабуп ҳәа ралҳәеит, иагьазгәалҭеит аԥсуааи адыгааи жәларык шракәу, хылҵшьҭрак шрымоу, убри аҟнытә аизыҟазаашьақәа рырҿиара шаҭаху.

Арҿиаратә хәылԥазы аиҿкааҩ, ауаажәларратә еиҿкаара "Ацҳа" аицхантәаҩ Дифа Габниаԥҳа Sputnik акорреспондент илалҳәеит аиԥылара Владислав Арӡынба ихьӡ зху Афырхаҵареи ахьӡ-аԥшеи рҳәынҭқарратә музеи аҟны амҩаԥгара зыӡбаз.

"Зарина Ҟаныҟәа лашьа Нургали Ҟаныҟәа Аԥсны Аџьынџьтәылатә еибашьра 1992-1993 шықәсақәа рзы Гагра ахақәиҭтәраан Мамзышьха дҭахеит. Убри аҟнытә иҳаӡбеит ахәылԥазгьы араҟа амҩаԥгара. Иаҳҭахуп Кавказтәи ҳашьцәеи ҳареи ҳаимадарақәа зырӷәӷәо ас еиԥш иҟоу аиԥыларақәа еиҳахар", — лҳәеит Габниаԥҳа.

Аԥсны ахада иабжьагаҩ Владимир Занҭариа иазгәеиҭеит ас еиԥш иҟоу ахәылԥазқәа акыр шрыҵаркуа еизааигәоу ажәларқәа реибабаразы, реиҭанаиааирақәа рырҿиаразы.

© Sputnik Томас ТхайцукТворческий вечер Зарины Каноковой. Фото с места события.
1/2
Творческий вечер Зарины Каноковой. Фото с места события.
© Sputnik Томас ТхайцукТворческий вечер Зарины Каноковой. Фото с места события.
2/2
Творческий вечер Зарины Каноковой. Фото с места события.
1/2
Творческий вечер Зарины Каноковой. Фото с места события.
2/2
Творческий вечер Зарины Каноковой. Фото с места события.

"Аԥсуа-адыга еизыҟазаашьақәа ирыдҳәалоу аизыҟазаашьақәа иарбан хырхарҭас ирымазаалакгьы – аҭоурыхтә, аетно-культуратә, афилософиатә, арҭ зегьы азеиԥш Кавказтәи адоуҳатә феномен ахь иаҵанакуеит. Акырынтә еиҭаҳҳәаларгьы шьала-дала ҳшеизааигәоу атәы, ҳаидымгылар ҳмилаҭтә ҷыдарақәа ҳзеиқәмырхар ауеит", — иҳәеит Занҭариа.

Зарина Ҟаныҟәа диит 1969 шықәсазы Ҟабарда-Балкариатәи ареспубликаҿы. Далгеит Ҟабарда-Балкариатәи аҳәынҭқарратә университет афилологиатә факультет. Зарина Ҟаныҟәа акымкәа ажәеинраалақәа реизгақәа ҭлыжьхеит ҟабарда бызшәалеи урысшәалеи: "Игры в прятки", "Бусы с неба", "Ты и Я", "Адыгское село", "Тонкие связи". Зарина Ҟаныҟәа хадара азылуеит ареспубликатә еиҿкаара "Жан". Уи хықәкыс иамоуп еиуеиԥшым акультуратә, асоциалтә проектқәа рынагӡара ацхраара аҭара. Иара убас, Ҟабарда-Балкариатәи Ауаажәларратә палата аҟны акультура азҵаарақәеи аинформациатә хархәагақәеи ркомиссиа деиҳабуп.

Ажәабжьқәа зегьы
0