Арадиозыӡырыҩцәа аминистр 28-бызшәакны еиуеиԥшым азҵаарақәа ирҭеит. Инарҭбааз аиҿцәажәара мҩаԥыргеит маргарита Симониан, Сергеи Доренко, Алексеи Венедиктов.
Раԥхьатәи аҭыԥ ааныргкылеит Украине Донбасси рҭагылазаашьақәа ирызку азҵаарақәа. Венантәи инашьҭын азҵаара Урыстәыла ЛНР, ДНР рхьыԥшымра рызхаҵара ишзақәшаҳаҭми ҳәа.
"Ҳара раԥхьаӡа акәны ҳаззаҭгыло Украина – иаҳзааигәаӡоу насгьы иҳгәылоу тәылоуп, ҳашьцәа роуп, иаҳҭахуп пату зқәаҳҵо ауаа ибзианы инхарц. Уи ҟаларц азы Украина иакны иаанхароуп", — аҭак ҟаиҵеит аминистр.
Иара убас азыӡырыҩцәа Сергеи Лавров Мрагылареи Урыстәылеи реизыҟазаашьа атемала игәаанагара иазҵаауан. Урыстәыла адәныҟатәи аусқәа рминистр урҭ аизыҟазаашьақәа игәы ишалоу атәы азгәеиҭеит, раԥхьаӡа иргыланы Европатәи Аидгылареи Еиду Америкатәи Аштатқәеи, иара убас Урыстәылеи Мраҭашәареи реизыҟазаашьақәа рыҟны "есқьынагь акризистә аҭагылазаара" зынӡа иазыфеидаӡам ҳәа азгәеиҭеит.
Асанкциақәа ртәы уалацәажәозар, уи атемалагьы изныкымкәа азҵаарақәа рҭиуан, Лавров урҭ зынӡа дрызхәыцӡом ҳәа иҳәеит, избан акәзар Урыстәыла ахатә аарыхра арҿиароуп.
"Сара сгәаанагарала, ҳхатә аарыхрала ҳхы ныҟәаҳгартә ҳаҟоуп. Аха уи иаҵанакӡом, егьырҭ ахкқәа мап рцәаҳкроуп ҳәа, еиҳарак ахәаахәҭра абаланс анамоу аамҭазы, еилкаау анормақәа рыла аганқәа ирзыфеидоуп", — иациҵеит Лавров.
Иара убас Сергеи Ловров ирҭон хаҭалатәи азҵаарақәа. Иаҳҳәап, Урыстәыла ахадарахьы анеира планс имоума ҳәа.
"Даара исгәаԥхоит сызҿу аус. Сҭыԥ аҟны исылшо зегь ҟасҵалоит", — иазгәеиҭеит аминистр.
Аиҿцәажәара ишиашо ицо аефир арадиостанциақәа Sputnik, "Эхо Москвы", "Говорит Москва" рыҟны имҩаԥган.
