АҞӘА, лаҵ 12 – Sputnik, Бадраҟ Аҩӡба. Аԥсны Жәлар рпоет Баграт Шьынқәба ибаҟа амҵан ашәҭ шьыҵәрақәа рышьҭаҵара иалахәын Аԥсны ахада Рауль Ҳаџьымба, аԥыза-министр Артур Амқәаб,аԥыза-министр актәи ихаҭыԥуаҩ Шамиль Аӡынба, адепутатцәа, Ашәҟәыҩҩцәа реидгылеи Ашәҟәҩҩцәа Рассоциациеи рхаҭарнакцәа, ауаажәларра, ашколхәыҷқәа.
"Апоет, ашәҟәыҩҩы ду Баграт Уасил-иԥа дышҳагу умбарц залшом. Уи иҩымҭақәа ззымдыруа, ирыламцәажәо дыҟаӡам, урҭ зызку ҳара ҳҭоурых ауп. Уи иҩымҭақәа ҳарзымхәыцыр, уи иажәа ҳацымныҟәар, ашәҟәыҩҩы дызлацәажәоз аубыхцәа рлахьынҵа ҳаур ауеит, уаанӡа ҳхы наҳамгар ауп. Ҳашҳәынҭқарроу дырны, ҳшаӡәыку дырны, Баграт Уасил-иԥа ҳазқәиҵаз амҩа ангӡара аиуртә еиԥш аҟаҵара аҭахуп", — иҳәеит Аԥсны ахада Рауль Ҳаџьымба.
Баграт Шьынқәба ибаҟа амҵан ашәҭқәа рышьҭаҵара анаҩс, аҳҭнықалақь ашколхәыҷқәа апоет иажәеинраалақәа ирыԥхьеит.
"Ари хашҭра зқәым мшуп. Баграт Шьынқәба ипоезиа ҳмилаҭтә доуҳаҿы иааннакыло аҭыԥ акырӡа идууп. Уи апоезиа даналалоз аамҭазы аԥсуа литература акыр зҵзкуа аҩымҭақәа аланагалахьан, Дырмит Гәлиа, Самсон Ҷанба, Миха Лакрба, Иуа Коӷониа рҩымҭақәа. Ус шакәызгьы аԥсуа жәеинраала иаҭахын абаҩхатәра ҿыц, абаҩхатәра ду. Абас еиԥш иҟаз ароль Баграт Шьынқәба иахь ииасит. Иара ибзоураны аԥсуа жәеинраала иахьатәи ахаҿра, аԥшӡара, агармониа, уи аҵакы ҽаԥарак ԥхьаҟа игеит", — иҳәеит Аԥсны Жәлар рпоет Мушьни Лашәриа.
Баграт Шьынқәба – Аԥсны Жәлар рпоет, ажәеинраалақәа реизгақәа маҷымкәа иҭижьит, аҭоурыхтә роман "Ацынҵәарах", апоема "Ахрашәа" дравторуп.
