АҞӘА, лаҵ 15 – Sputnik. 2015 шықәсазы аусеицура аплан напаҵаҩуп Аԥсны Адәныҟатәи аусқәа рминистрреи Ҭырқәтәыла иҟоу Аԥсуа культуратә центрқәа рфедерациеи (Аԥсуафед) рыбжьара, ҳәа аанацҳауеит Адәныҟатәи аусқәа рминистрра апресс-маҵзура.
Адәныҟатәи аусқәа рминистр Виачеслав Чрыгбеи Ҭырқәтәыла иҟоу Аԥсуа культуратә центрқәа рфедерациа ахантәаҩы Рамазан Џьенгьиз Коч Ашәбеи реиԥылара мҩаԥысит ахәаша, лаҵара 15 рзы.
Ирыдыркылаз ауснагӡатә инақәыршәаны, аганқәа ргәы иҭоуп Ҭырқәтәылеи Мрагылара Ааигәа атәылақәеи ирықәынхо аԥсуа диаспора еиуеиԥшым хырхарҭала аус рыцура арҭбаара, иара убас Аԥсны зхы иақәиҭу, ихьыԥшым, идемократиатәу ҳәынҭқаррак аҳасабала ахьӡ аларҵәара ацхраара, ҳәа арбоуп аацҳамҭаҟны.
