АҞӘА, лаҵ 24 —Sputnik. Урыстәылатәи ашәаҳәаҩ Полина Гагарина аҩбатәи аҭыԥ аанылкылеит Австриа аҳҭнықалақь Вена имҩаԥысуаз амузыкатә конкурс "Евровидение-2015" аҿы. Абри атәы аанацҳауеит РИА Новости.
Ашәаҳәаратә конкурс "Евровидение-2015" ишиашоу ицо аефир ала Урыстәыла актәи аканал ала ахәаԥшцәа идырбан. Аконкурс аҿы аиааира игеит Швециатәи ашәаҳәаҩ Монс Сельмерлев, уи 365 балл иоуит, аҩбатәи аҭыԥ аанылкылеит Урыстәылатәи ашәаҳәаҩ Полина Гагарина (303 балл), ахԥатәи — Италиатәи ашәаҳәаратә гәыԥ Il Volo (292 балл).
Амузыкатә конкурс "Евровидение-2015" рхы аладырхәит 27 тәыла, абри аишьҭагылашьа ала: Словениа, Франциа, Израиль, Естониа, Британиа ду, Иармантәыла, Литва, Сербиа, Норвегиа, Швециа, Кипр, Австралиа, Бельгиа, Австриа, Бырзентәыла, Черногориа, Германиа, Польша, Латвиа, Румыниа, Испаниа, Венгриа, Қырҭтәыла, Азербаџьан, Урыстәыла, Албаниа, Италиа.
