АҞӘА, рашә 17 – Sputnik, Асҭанда Арӡынԥҳа. Аҳәынҭқарратә аурыс драматә театр аҟны аԥхынтә сезон аартра аҽазыҟаҵара мҩаԥысуеит, лҳәеит Аурыс драматә театр асахьаркыратә напхгаҩы Нина Балаева.
Аԥхын Аԥсны хыԥхьаӡара рацәала аԥсшьацәа аҭаауеит, урҭ реиҳараҩык атәыла атеатралтә ԥсҭазаара рбарц рҭахуп, артистцәа русура убри аҟнытә акыр иацлоит, азгәалҭеит уи.
Уи лажәақәа рыла, Аҳәынҭқарратә аурыс драматә театр аҟны сынтәа иқәыргылахоит ахәаԥшцәа ирдыруа аспектакльқәа реиԥш, иҿыцқәоугьы. Балаева излалҳәо ала, асценахь ихынҳәуеит Бернард Шоу ипиеса иалху аспектакль "Смуглая леди сонетов".
"Ари аспектакль атеатр арепертуар ахь иргьежьуп. Асценатә композициа иалоуп Шекспир итекстқәа. Акрааҵуеит ҳхатәы спектакльқәа ықәаҳмыргылеижьҭеи, убри аҟнытә апремиератә спектакль еиԥш ҳҽазыҟаҳҵон", — лҳәеит Балаева.
Аспестакль "Смуглая леди сонетов" Аурыс драматә театр арепертуар иалалеит 2009 шықәсазы, иқәлыргылеит Нелли Ешԥҳа.
"Аурыс театр артистцәа рхы аладырхәуеит Аԥсны имҩаԥысуа аԥхынтә гострольқәа. Ҳгәы иҭоуп ҳапрограмма Гәдоуҭеи Гагреи дырбара. Агострольқәа рымҩаԥгара азгәаҭоуп ԥхынгәымзеи нанҳәамзеи рзы", — ацылҵеит Нина Балаева.
Аурыс драматә театр асахьаркыратә напхгаҩы лажәақәа рыла, аԥхын агострольқәа рымҩаԥгара акыр ауадаҩрақәа ацуп, аусура ахьырацәоу аҟнытә. Артистцәа ргәы иҭоуп мчыбжьык ала ахәаԥшцәа акымкәа аспектакльқәа дырбара.
