АҞӘА, рашә 18 — Sputnik, Нала Аҩӡыԥҳа. Аԥсуа драматә театр иааиуа амчыбжь азы иалагоит аспектакльқәа ахәаԥшыҩцәа дырбара. Абри атәы ҳзааицҳаит Аԥсуа драматә театр арежиссиор хада, адраматург Валери Ақаҩба.
Ахәаԥшыҩцәа ирылшоит иаарласны аспектакльқәа "Атеатр аартра", "Гәараԥаа рписар", "Аҽшьҩы", "Махаз" уҳәа рбара.
"Атеатр аартра" ақәгылара иеиднакылоит аспектакльқәа жәба рцыԥҵәахақәа, урҭ аспектакль арепертуар ахь аекскурс ҟанаҵоит ҳәа азгәеиҭеит Валери Ақаҩба.
Арежиссиор хада иажәақәа рыла ахәаԥшра иаздырхиоит иҿыцу аспектакльқәагьы. Урҭ иреиуоуп "Абнатә лакә" — Алхас Шамбеи Валентин Кәаӷәаниеи рҩымҭала, амузыкатә спектакль "Аҳ деилазгаз ауаҩы" — Мадина Аргәын лықәыргыламҭа, Славомир Мрожек иҩымҭа иалху "Шьапыла".
Адрамтеатр аколлектив аус адырулоит аспектакльқәа реиҭашьақәыргылара апроцесс, иҳәеит Валери Ақаҩба. Иҟоуп Аԥсны анҭыҵгьы збара иазыгәышьуа аспектакльқәа: "Ажәҩан аҟәара", "Иули Цезар", "Аԥсҭазаара ԥхыӡуп" уҳәа убас егьырҭгьы. Урҭ еиҭашьақәыргылатәуп. Атеатртә спектакль ахы ахьчозароуп, абызшәатә еилибамкаара амамзароуп.
"Ҳара иҳагәҭакуп дарбанызаалак, дамереканецума, дпапуасума, друмынума асценаҟны имҩаԥысуа абызшәа иахьмырԥшыкәа аинтерес иркра", — иҳәеит арежиссиор.
Иагьааигеит абри аҩыза аҿырԥштәы: "Ҳара "Кьоџьаа рҭыӡшәа" Швеицариа ианықәҳаргылоз, ахәаԥшцәа руаӡәы – Иубер, акулис аҟны дтәаны аԥсуа бызшәа дазыӡырҩуа аспектакль дахәаԥшуан".
Аԥсуа драматә театр 2014 шықәса ԥхынҷкәын азы иаанартит атеатртә сезон, атеатр аиҭашьақәыргыларатә усурақәа рышьҭахь. Самсон Ҷанба ихьӡ зху Аԥсуа драматә театрареконструкциазы иаркын 2009 шықәса рзы.
