АҞӘА, рашәара 23, Sputnik, Наала Аҩӡыԥҳа. Атәылаҟны ираԥхьатәиу ахәыҷтәы инклиузивтә хәмарырҭа аргылара адгыларазы Аԥсны ихацыркхеит агәыҳалалратә концертқәа "Агәшаҭара анотақәа". Аԥхьатәи аконцерт мҩаԥысит Аҳәынҭқарратә филармониаҟны, аҩаша, рашәара 23 рзы.
Афонд "Вереск" адиректор Викториа Думааԥҳа Sputnik ишазеиҭалҳәаз ала апроект ахықәкы – еиуеиԥшымкәа алшарақәа змоу ауаа ауаажәларраҟны аинырра рылыршароуп.
"Адунеи зегь аҟны гәабзиарала алшара змам ахәыҷқәеи згәы бзиоу ахәыҷқәеи еилырхӡом. Сгәы иаанагоит ҳаргьы ари ашьаҿа ҟаҳҵароуп ҳәа", — лҳәеит Викториа Думааԥҳа.
Викториа Думааԥҳа лажәақәа рыла Аҟәа мацара зылшарақәа маҷу ахәыҷқәа рхыԥхьаӡара 375-ҩык ыҟоуп. Иҟалап ари аибашьра ахылҟьа-ҿылҟьақәа ракәзар изыхҟьаз ҳәа лгәы иаанагоит Викториа Думааԥҳа.
Агәыҳалалратә концерт аиҿкааҩ, амузыкант Ольга Дашевскаиа лажәақәа рыла, ауаажәларра рҟны агәыҳалалра амҩаԥгара иаразнакы изцәырҵуам. Агәшаҭара анотақәагьы" зызку убри ауп.
"Ҳхықәкы маҷ – ахәыҷтәы хәмарырҭа аартра, ҳхықәкы ду – агәыҳалалразы ауаажәларратә хдырра арҿыхара. Реиҳа иҿиоу атәылақәа рҟынгьы агәыҳалалра маҷ-маҷ ауп ауаажәларра ишрылаҵәо", — лҳәеит О. Дашевскаиа.
Амузыкант Михаил Алхазов Ольга Дашевскиа лидеиа дадгылеит.
"Ҵыԥх Ольга исыдылгалеит агәыҳалалратә концерт аҟны слыцықәгыларц.Ҳара хазы-хазы ҳпартиақәа ҳҵон.Лара – Америка, сара – Аԥсны. Нас ара ҳаиқәшәеит", — еиҭеиҳәон Михаил Алхазов.
"Аконцерт апрограмма аномерқәа зегьы ҩыџьа рзы иазырхиан. Ҳара ҳанеицхыраауа илашо акы аԥҵара ҳалшоит", – азгәалҭеит Дашевскаиа.
Аконцерт аан азал иҩныҩуан Гендель, Моцарт, Бетховен, Бизе, Глазунов, аԥсуа композитор Петр Петров рмузыка.
