АҞӘА, ԥхынгәы 8 — Sputnik. Апроект "Ишьхатәылоу Аԥсны" Берлин ақалақь аҟны иҟоу аресторан "Abhcasia" (Аԥсны) аҟны ԥхынгәы 7 рзы имҩаԥысыз раԥхьатәи аԥсуа культуратә хәылԥазы аҟны идырбан, ҳәа акорреспондент изааицҳаит апроект автор Ҭенгьиз Ҭарба.
Ҭарба иажәақәа рыла, ауснагӡатә еиҿылкааит Евроеидгылаҟны Аԥсны акультуразы атташе Виолетта Рудт-Аҩӡыԥҳа.
"Виолетта Берлин иаартны илымоуп даара ишьахәу аресторан "Abhcasia". Акультуратә хәылԥазы аԥхарра зҵаз аҭагылазаашьаҟны имҩаԥысит, ҳара Аԥсни, иара аԥсабареи, аҭоурыхи акультуреи рыӡбахә ҳалацәажәон. Еизаз идырбан афотосахьақәа, авидеороликқәа, Аԥсны ашьхара иазкыз. Агәра згоит ари ашьаҿа шраԥхьатәиз, Берлин еиҭахгьы имҩаԥысраны иҟоуп асеиԥш иҟоу ахәылԥазқәа", — иҳәеит Ҭарба.
Виолетта Аҩӡыԥҳа лгәаанагарала асеиԥш иҟоу ахҭысқәа ирылшоит Аԥсны азхаҵара иацхраарц.
"Сара, атташе лаҳасабала исыӡбеит акультуратә центр – аресторан "Abhcasia" аҟны ацәыргақәҵа еиҿыскаарц. Абас, акультура ацхырааралоуп Аԥсны азхаҵара шалшо. Имҩаԥысыз аус ҳтәылазы акыр иӡыргара бзиан", — азгәалҭеит лара.
"Уи ауха аресторан иаҭан анемец милаҭ рымацара. Урҭ ирбаз ашьҭахь ирҭаххеит Аԥсны аҭаара. Аресторан аҟны аҭыԥқәа шмаҷызгьы, асасцәа рацәаҩын", — азгәалҭеит Аҩӡыԥҳа.
Виолетта Рудт-Аҩӡыԥҳа инаҵшьны илҳәеит лресторан аҟны акультуратә хәылԥазы амҩаԥгара аӡәгьы мап ацәкра азин шимам. Лара иазыԥхьагәалҭоит Аԥснынтәи аҩи ацхеи Европаҟа анагара.
Лара убасгьы иацылҵеит аԥсуа чыс аресторан аҭааҩцәа рзы аинтерес ду шцәырнагаз.
"Зегьы аинтерес роуит аԥсуа чыс агьама абаразы. Гәахәарылагьы ирымҵагылаз рфон. Сара ахәыҟаҵаҩ дсымам, схаҭа соуп афатә ҟазҵаз. Даара исҭахын Аԥснынтәи ахәыҟаҵаҩцәа насыԥхьар аха ҩыџьа авиза аиуразы мап рцәыркхьеит", — лҳәеит лара.
Аҩӡыԥҳа иара убасгьы иаҳзеиҭалҳәеит акультуратә центр "Abhcasia" аҟны иааиуа амчыбжь азы "Адунеи алакәқәа"захьӡу ахәылԥаз аиҿкаара шлыгәҭаку. Араҟа, ҳәарада, аԥсуа лакәқәагьы еиҭаҳәахоит иара убасгьы иазыԥхьагәалҭоит афиласофиатә хәылԥази аԥсуа-мексикатәи ахәылԥази реиҿкаара.
Аресторан "Abhcasia" аатит 2015 шықәса хәажәкырамзазы, Курфиурстендамм абульвар иацәыхарамкәа, Дальманштрассе аҭыӡҭыԥ ала. Аресторан аҟны иҟоуп алшара аԥсуа чысқәа ргьама абареи аԥсуа милаҭтә музыка азыӡырыҩреи рзы.
