АҞӘА, ԥхынгәы 15 — Sputnik, Бадраҟ Аҩӡба. Тҟәарчалтәи абжьаратә школ арҵаҩцәа иаарласны ираҳҭараны ҳаҟоуп рулафахәы ҳәа Sputnik акорреспондент иеиҳәеит Аԥсны Аԥыза-министр Артур Амқәаб.
"Абри аус аганахьала Афинансқәа рминистрра адҵа аҭоуп. Тҟәарчалтәи ашкол арҵаҩцәа ироураны иҟаз аԥара иаарласны ирызшәахоит. Уи аганахьала гәхьаа ыҟаӡам", — ҳәа азгәеиҭеит Амқәаб.
Ацәгьоуцәа Тҟәарчалтәи а-5-тәи абжьаратә школ адиректор Дмитри Шьоууа иқәлеит ԥхынгәы 10 рзы, асааҭ 10 рзеиԥш. Миллионбжак аҟынӡа арҵаҩцәа рулафахәы аԥара имырхит.
Ацәгьоуцәа рыԥшаара Тҟәарчалтәи араион Аҩныҵҟатәи аусқәа рорганқәа аҿуп. Ацәгьоуцәа злааз автомашьына рыблит рышьҭа дырӡырц азы. Амилициа агәаанагара рымоуп, иҟарҵаз ақәылара ашьҭахь аӷьычцәа абнара рҽарҭеит ҳәа.
