"Акаҳуатә кантата" раԥхьаӡа акәны аԥсуа зыӡырыҩцәа иддырҳауеит

© Sputnik Томас ТхайцукАфиша
Афиша - Sputnik Аҧсны
Анапаҵаҩра
"Акаҳуатә кантата" - адунеи аҟны зегь раасҭа акаҳуа бзиа избоз аԥҳәызба Лизхен илызку ақьачақь кантата, Ацқьа Фама иуахәама акантор Иоҳан Себастиан Бах иҩит ҩышәи ҩынҩажәижәаба шықәса раԥхьа, Леипциг иаартыз Циммерман икаҳуатә ҩны аҳәарала.

АҞӘА, ԥхынгәы 16 — Sputnik, Бадраҟ Аҩӡба. Иоҳан Себастиан Бах икантата "Акаҳуатә кантата" раԥхьаӡа акәны аԥсуа хәаԥшҩы идгалахоит ԥхынгәы 17 рзы, аихамҩатә станциа "Гәыма" аҟны.

"Ари апроект даараӡа аинтерес аманы иҟоуп ҳәа сгәы иаанагоит. Аиҳаракгьы аинтерес аҵазар ҟалап, избанзар уа иззышәаҳәо – акаҳуа, ҳаргьы даара бзиа ибаны иаажәуеит. Сара сгәы хыҭ-хыҭуеит, избанзар ари акантата раԥхьаӡа акәны Аҟәаа ираҳауеит. Акаҳуа бзиа избои Бах имузыка агәалаҟазаара бзиа зызцәырнагои зегьы аконцерт ахь шәааҳаԥхьоит", — ҳәа Sputnik акорреспондент иалҳәеит Алиса Гыцԥҳа.

Аспектакль иалахәуп Москватәи атеатр "Геликон-опера" асолистцәа: Аԥсны жәлар рартистка, Урыстәыла зҽаԥсазтәыз артистка Алиса Гыцԥҳа (асопрано), Алексеи Исаев (абаритон), Дмитри Хромов (атенор) иара убасгьы ансамбль "Каприччио" (анапхгаҩы – Аԥсны жәлар рартист Михаил Алхазов).

Афестиваль "Хьыбла Гьерзмаа шәаалыԥхьоит…" мҩаԥысуеит Аԥсни Америкеи

Аспектакль арежиссиор, ақәыргылаҩ – Џьамбул Жорданиа, амузыкатә напхгаҩы – Михаил Алхазов, асценографиеи акостиумқәеи равтор – Анна Гиурегиан.

"Акаҳуатә кантата" — адунеи аҟны зегь раасҭа акаҳуа бзиа избоз аԥҳәызба Лизхен илызку ақьачақь кантата, Ацқьа Фама иуахәама акантор Иоҳан Себастиан Бах иҩит ҩышәи ҩынҩажәижәаба шықәса раԥхьа, Леипциг иаартыз Циммерман икаҳуатә ҩны аҳәарала.

Аԥҳәызба загь раасҭа акаҳуа агьамеи афҩы хааи дрыдрыԥхьалоит. Лаб уи усҟак ишигәамԥхогьы, лара акаҳуаршра ритуалк илзаҩызоуп. Рацәак идуум адиалогқәа иаҳдырбоит аԥҳәызба ари арыжәтә ахь илымоу агәазыҳәареи лаби лареи уи иахҟьаны ирымоу аимакқәеи.

Акантата акомикатә опера иазааигәоуп. Азыӡырыҩцәагьы еснагь гәахәарыла ирыдыркылоит. Иара акаҳуа ахаҭа акәзар, акантата анагӡараан ашәаҳәаҩцәа иахьдыршуагьы, ԥшаарыхрак еиԥш иубоит.

Ажәабжьқәа зегьы
0