500-ҩык инареиҳаны аԥсылманцәа аџьаамахьы анамаз акра инеит

© Sputnik Томас ТхайцукАԥсны Иаку аԥсылманцәа рдоуҳатә напхгара ахантәаҩы Салих Кәарацхьелиа.
Аԥсны Иаку аԥсылманцәа рдоуҳатә напхгара ахантәаҩы Салих Кәарацхьелиа. - Sputnik Аҧсны
Анапаҵаҩра
Аԥсны Иаку аԥсылманцәа рдоуҳатә напхгара ахантәаҩы Салих Кәарацхьелиа иажәақәа рыла, Аҟәатәи аџьаамаҟны аныҳәатә намаз ахь иааит 500-ҩык инареиҳаны аԥсылманцәа.

АҞӘА, ԥхынгәы 16, Sputnik. Анжелика Бениаԥҳа. Аԥсны Иаку аԥсылманцәа рдоуҳатә напхгара ахантәаҩы Салих Кәарацхьелиа игәаанагарала, Аҟәатәи аџьаамаҟны аныҳәатә намаз ахь иааит 500-ҩык инареиҳаны аԥсылманцәа.

Кәарацхьелиа Аԥсни адунеи зегьы аҟни инхо аԥсылманцәа ирыдиныҳәалеит Аурычра аҵыҵра амшныҳәа.

"Аԥсни адунеи зегь аҟни инхо аԥсылманцәа ирыдысныҳәалоит аурычраныҳәа. Ҳара иахьа иазгәаҳҭоитт Рамадан мза хзыркәшо Ураза-баирам (Ид аль-Фитр). Иахьа ашамҭазы, аџьаамахьы аныҳәатә матанеира мҩаԥыргарц инеиит 500-ҩык инареиҳаны аԥсылманцәа. Аџьаама агәарԥ хышәҩык иреиҳамкәа иахьакуа иахҟьаны, иеизаз адәахьы, амҩаҟны аматанеира мҩаԥыргон", — иҳәеит Кәарацхьелиа.

Иара иажәақәа рыла, аурычра аҵыҵра аныҳәа аԥсылманцәа рзы еиҳа ихадақәоу рахь иаҵанакуеит.

"Иахьа аԥсылманцәа рныҳәа дуқәа ҩба рҟынтә руак — аурычраныҳәа мҩаԥысуеит. Иахьатәи амш еиҳарак иазгәарҭоит аныҳәатә матанеира ала. Ари аныҳәа Рамадан амза хнаркәшоит. Аԥсылманцәа матанеирыла ргәырӷьара аадырԥшуеит, уи иаанаго Хыхь иҟоу имҵахырхәароуп", — иҳәеит Кәарацхьелиа.

Традициала ишаԥу еиԥш, афара-чареи агәырӷьареи ауацәеи, аҩызцәеи, агәылацәеи ирыцеиҩыршоит. Убри аан урҭ аҽа динк иаҵанакуазаргьы ауеит. Зегь реиҳа ихадароу амла иакуеи арыцҳацәеи аганахь равамыжьроуп.

Ид аль-Фитр (Ураза баи-рам) аныҳәа аԥсылманцәа ирыдиныҳәалеит аимам Оскул Ҳаразиагьы.

"Сашьцәа, саҳәшьцәа, ишәыдысныҳәалоит абри аныҳәа лаша! Иарбанызаалак аҩнахьы инанагааит иара агәыӷра, аиашара, абзиара, абарақьаҭра", — иҳәеит Ҳаразиа.

Салих Кәарацхьелиа адырра ҟаиҵеит ахәыҷқәа зегьы рзы апарк "Алакә" аҟны асааҭ 10:00 — 15:00 рҟынӡа ишеиҿкаахо хәыда-ԥсада аттракционқәа, аниматорцәа злахәу агәырҿыхгатә программақәа.

Ажәабжьқәа зегьы
0