АҞӘА, ԥхынгәы 31 — Sputnik, Наала Аҩӡыԥҳа. Традициала иԥшьоу ҳәа ирыԥхьаӡоу аҭыԥқәеи урҭ ирыԥну аҵакырадгьылқәеи ҷыдала ихьчалатәу аԥсабаратә ҭыԥқәа рсиахь иаҵадыркит. Ари аԥҟара арбоуп ԥхынгәы 30 рзы Жәлар Реизара адепутатцәа аҩбатәи аԥхьарала ирыдыркылаз "Ҷыдала ихьҷалатәу аԥсабаратә ҭыԥқәа" рзы Азакәан.
Адепутат Кан Кәарҷиа аилкаара аиҭеит азакәан аԥҟара ҿыц.
"Традициала иԥшьоу ҳәа ирыԥхьаӡо аҭыԥқәеи урҭ ирыԥну аҵакырадгьылқәеи ҷыдала ихьчалатәу аԥсабаратә ҭыԥқәа рсиахь иаҵаҳаркит избанзар, иахьазы, аԥсабаратә ҳәырԥсаррақәа роуп иреиҳау астатус зманы иҟоу", — иҳәеит иара.
Уи адагьы, азакәанапроект еихнашоит ихьчатәу аҵакырадгьылқәа ареспубликатәии ақалақьтәии ҵак рымазаара. Кәарҷиа ишазгәеиҭаз ала, аҳәырԥсаррақәеи егьырҭ ареспубликатә ҵакы змоу аҵакырадгьылқәеи рганахьала иарбанызаалак Аминистрцәа Реилазаара иаднакыло аӡбра Жәлар Реизараҟны ишьақәырӷәӷәахароуп.
Атәыла иуникалтәу аԥсабаратә комплексқәа реиқәырхара хықәкыс иҟаҵаны, аҩбатәи аԥхьарала ирыдыркылаз азакәанапроект иҭышәнанартәалоит ҷыдала ихьчатәу аҵакырадгьылқәа рхархәара аусхк аҟны аҳәынҭқарратә политика азинтә шьаҭақәа.
