АҞӘА, нанҳәа 13 — Sputnik, Саид Барганџьиа. Аԥсны Ахада Рауль Ҳаџьымба Маргарита Ладариаԥҳа лиубилеи лыдиныҳәалеит.
Рауль Ҳаџьымба Маргарита Ладариаԥҳа илзеиӷьеишьеит анасыԥ, ақәҿиарақәа.
"Шәаԥхьаҟагьы аус рацәа шьҭоуп, сара агәра згоит шәыгәҭакқәа зегьы нашәыгӡап ҳәа" — иҳәеит атәыла Ахада.
Аԥснытәи Аҳәынҭқарратә университет аректор Алеко Гәарамиа иара убасгьы длыдныҳәалеит аиубилиар.
"Дыҟан Даттәи Маргарита, дыҟан Парматәи Маргарита, дыҟан Маргарет Тетчер – урҭ зегьы агуманитартә наукақәа ирхаҭарнакцәан. Сара Маргарита Ладариаԥҳа Аԥснытәи Маргарита ҳәа лзысҳәоит", — иҳәеит Гәарамиа.
Аҵарауаҩ илыдныҳәалаз ҭабуп ҳәа ралҳәеит.
"Сара сабшьҭра зегьы аинтерес зҵаз уаан. Урҭ рыгәҭа иҟан аҵарауаа, аныхамаҵзуҩцәа, ажурналистцәа. Сара сшыхәыҷыз алитература аинтерес скит. Сара ԥсҭазаарас исымоу сусуроуп. Сеигәырӷьоит астудентцәа санеилыркаауа, ирысҭо, ирызназго аҭак ансоуа. Сышықәсқәагьы схашҭуеит", — лҳәеит лара.
Маргарита Ладариаԥҳа 1948 шықәса рзы далгеит Потиомкин ихьӡ зху Москватәи апедагогикатә институт, аурыс бызшәеи алитературеи рфакультет. Иара убраҟа 1954 шықәсазы акандидаттә диссертациа лыхьчеит. 1984 шықәса рзы илыхьчеит адоктортә диссертациа "Тургеневи Франциа ХХ-тәи ашәышықәса ашәҟәыҩҩцәеи" атемала.
