АҞӘА, нанҳәа 14 — Sputnik, Бадраҟ Аҩӡба. Аҧсны жәлар Рџьынџьтәылатә еибашьра алагара амши хатәгәаҧхарала еибашьуаз рымши ирызкны Владислав Арӡынба ихьӡ зху Ахьӡ-аҧша амузеи аҟны ахәаша, нанҳәа 14 рзы иаадыртит ацәыргақәҵа.
Амузеи аҟны ицәыргоуп аибашьра раҧхьатәи амшқәа рзы иҭахаз рфотосахьақәеи арратә корреспондент Рамин Қаџьаиа иархив аҟынтәи афотосахьақәеи иара убасгьы афотограф-адокументалист Олег Климов иусумҭақәа.
"Ари ацәыргақәҵа аиҿкаараан ҳара иҳацхрааит Атәылахьчара аминистрра, атәылаҟны иҟоу афинанстә ҭагылазаашьа уадаҩ иахьмырҧшыкәа ирылшоз ҟарҵеит. Аибашьцәа рымаҭәа ҳарҭеит рҭаацәа", — лҳәеит Владислав Арӡынба ихьӡ зху Ахьӡ-аҧша амузеи адиректор Мзиа Беиаҧҳа.
Амузеи аҭааҩцәа ирбар рылшоит афотокорреспондент Витали Қьецба иархив аҟынтәи хатәгәаҧхарала иааны иҳацеибашьуаз рфотосахьақәа, иара убасгьы Атәылахьчара аминистрра ацхыраарала еиҿкаау абџьар аекспозициа, аибашьцәа рҳамҭақәа, рымаҭәақәа.
"Сара сашьа Аркади Чачхалиа иоуп. Иара дҭахеит 1993 шықәса цәыббра 16 рзы, Цагьара. Араҟа аекспозициа еиҿкаахоит ҳәа ансаҳа имаҭәақәа аазгеит" — лҳәеит аибашьҩы иаҳәшьа Анжела Чачхалиаҧҳа
Амузеи аекспозициа аҭааҩцәа рзы еиҿкаауп Лука Гаделиа инагӡарала ауарӷантә музыка арҳәареи Кристина Ешҧҳа лынагӡарала авокалтә шәаҳәареи.
Аибашьра алагара амш иазку аекспозициеи хатәгәаҧхарала еибашьуаз Рымш иазку афотоцәыргақәҵеи мҩаҧгахоит нанҳәа 14-15 рзы.
