ГАГРА, нанҳәа 19 — Sputnik, Саида Жьиԥҳа. Пицундатәи ауарӷан 40 шықәса ахыҵра инамаданы есшәахьа ауахәамаҿы имҩаԥысуеит аклассикатә музыка аконцертқәа. Аконцерт еиднакылоит Аԥсныи, Урыстәылеи, аҳәаанырцәи рҟнытә ауарӷанарҳәаҩцәа, ахкынагӡаҩцәа уҳәа аклассикатә музыка азҟазацәа.
Ԥхынгәы 17 рзы Пицундатәи ауахәамаҿы имҩаԥысит ауарӷантә музыкеи, авокали, апоезиеи ахьеилагӡаз аконцерт.
Аԥсныи Урыстәылеи зыхьӡ наҩхьоу ауарӷанарҳәаҩ Лука Гаделиеи ахкынагӡаҩ Кристина Ешԥҳаи Урыстәылатәи арежиссиор-аклипмеикер Ирина Мироновеи азыӡырыҩцәа ирызнаргеит дара рхаҭақәа ишьақәдыргылаз еилагӡаз апрограмма.
Ирина Миронова ауарӷан абжьы иақәшәаны дрыԥхьеит еицырдыруа апоетцәа Пушкини Лермонтови раԥҵамҭақәа рҟнытә ацыԥҵәахақәа, Кристина Ешԥҳа иналыгӡеит ариақәа. Азыӡырыҩцәа агәахәара рнаҭеит Лука Гаделиа инаигӡаз Бахи Качини раԥҵамҭақәа.
"Сара Аԥсныҟа ааԥхьара сырҭеит сҩызцәа Лука Гаделиеи Кристниа Ешԥҳаи. Араҟа сценак аҟны ҳаицықәгылара агәахәара ду снаҭеит. Агәра згоит ас еиԥш иҟоу иаҳзеиԥшу аконцертқәа ҳаԥхьаҟагьы имҩаԥаҳгап ҳәа. Сара сзыԥхьоз апоезиа азыӡырыҩцәа ирызназгеит аԥхьаҩ азҟаза иеиԥш акәымкәа схатә елементқәа алаҵаны, сгәы иаанагоит аконцерт иаҭааз зегьы агәахәара рнаҭеит", — ҳәа азгәалҭеит Миронова.
Ирина Миронова авторс дрымоуп 600 рҟныӡа аклипқәа, урҭ рхыԥхьаӡараҿы иҟоуп Алла Пугачиовеи, Кристина Орбакаитеи, Лаима Ваикулеи агәыԥ Би-2 рыклипқәа.
Аԥсни Урыстәылеи рартистцәа еицырзеиԥшу аконцертқәа Пицундатәи ауарӷан 40 шықәса ахыҵра инамаданы имҩаԥысуеит даҽа 15.
"Пицундатәи ауарӷан 40 шықәса ахыҵра иазку аиубилеитә концертқәа рымҩаԥгараҿы ацхыраара ҳарҭоит Москватәи аԥсуа диаспора ахаҭарнакцәа. Дара рыбзоурала арахь иааҳаԥхьоит еицырдыруа амузыкантцәа. Иҭабуп ҳәа расҳәоит ахаҵгылара ҳазҭо зегьы", — иҳәеит ауарӷанарҳәаҩ Лука Гаделиа.
Ауарӷанарҳәаҩ иажәақәа рыла, цәыббрамзазы иазԥхьагәаҭоуп Микаел Таривердиев иԥшәма ԥҳәыс Вера Таривердиева дызлахәу аконцерт амҩаԥгара.
Микаел Таривердиев аамҭала Аԥны иаԥиҵахьан еицырдыруа акинофильмқәа рзы ашәақәеи амузыкеи, иаҳҳәозар "17 мгновений весны", "Ирония судьбы или с легким паром".
"Пицундатәи ауарӷан абзоуралоуп ҳара, еиҵагыло амузыкантцәа, ҳаҩаӡара еиҳагьы ишыҳаракхо, убри аҟнытә ҳахәҭакахьала арҭ аконцертқәа ҳамҭак аҳасабала имҩаԥаагоит ауахәамаҿы", — ҳәа азгәалҭеит Кристина Ешԥҳа.
Абҵара 1 азы Пицундатәи ауарӷан 40 шықәса ахыҵуеит. Ари арыцхә инамаданы араҟа имҩаԥгахоит зымҽхак ҭбаахо аконцерт. Уи иалахәхоит Аԥсни Урыстәылеи Аҳәаанырцәи рҟнытә амузыкантцәа.
