АҞӘА, цәыббра 10 — Sputnik, Анжелика Бениаԥҳа. Астратегиатә сессиа "Аԥсны акультура: актуалыртәреи аиқәырхареи" ҩымштәи аусура хыркәшахеит Аҟәа, Амилаҭтә библиотекаҟны, цәыббра 9 рзы.
Акультуреи аҭоурых-культуратә ҭынха аиқәырхареи рминистр Ельвира Арсалиаԥҳа дазааҭгылеит асессиа амҩаԥысшьа.
"Агәыԥқәа рҟны аусурақәа аинтерес рыҵаны имҩаԥысуан. Ҳазлацәажәоз апроектқәа рыбжа акәзаргьы анагӡара ҳалшар даара ибзиан. Уажәазы ҳара аамҭа ҳҭахуп апроекттә документ азырхиаразы" — лҳәеит лара.
Аԥсны аиҳабыра ааԥхьаразы ҭабуп ҳәа раҳәо астратегиатә сессиа аконсультант, аиҿкааҩ Светлана Калашникова иазгәалҭеит астратегиатә сессиаҟны аусура аԥсуа ган адагьы аурыс ган азгьы ԥышәак ишеиԥшыз.
"Ҳара аусура агәахәара ду ҳнаҭон. Асеиԥш иҟоу асессиа аиҿкаара ашәарҭара ацын. Аҭыԥантәи аменталитет, амилаҭтә ҷыдарақәа, аҵакырадгьылтә ҟазшьақәа уҳәа азгәаҭо акгьы ҳазмырҽеир ҳәа ҳшәон. Аха зегьы ҳшақәымгәыӷуаз еиԥш иҟалеит. Иаҳҳәап, шәҩык рҟынӡа алахәылацәа ҳарзыԥшызар, иаҳзааит 147-ҩык. Ауаа аинтерес ду аадырԥшит", — лҳәеит аексперт.
Калашникова еиҭалҳәон астратегиатә сессиа аусура ацашьеи ԥхьаҟатәи апланқәеи ртәы.
"Асессиа аусура х-етапкны имҩаԥысуан. Актәи аетап – аҽазыҟаҵаратә етап акәын, аҩбатәи – иара асессиа ахаҭа амҩаԥгара акәын, иаанхаз ахԥатәи аетап ахь иаҵанакуеит апроектқәа рынагӡара аетап. Ҳара даара иаҳҭахуп ҳазлацәажәаз атемақәа иаарласны рыларҵәара", — азгәалҭеит Калашникова.
Астратегиатә сессиа "Аԥсны акультура: актуалыртәреи аиқәырхареи" аҳәаақәа ирҭагӡаны аус руан асекциақәа хԥа: "Аҿартәи аҭаацәаратәи аудиториаҟны акультура атрадициатә усҳәарҭақәа рырҿиара. Аудиториа аус рыдулашьа аформа ҿыцқәа. Акультураҟны амениџьмент"; "Акиноаалыҵ аҭыхреи уи дырбареи рзинтә ҭышәныртәалара"; "Аҭоурых-культуратә ҭынха аиқәырхареи актуалыртәреи".
Астратегиатә сессиа асекциақәа рҟны иалахәын Аԥсны Аҳәынҭқарра анапхгареи, акультура аусбарҭақәеи, абизнеси анаплакыреи рхаҭарнакцәа, иара убасгьы акультура аусхк аҟны урыстәылатәи аекспертцәеи апрактикцәеи.
Астратегиатә сессиа "Аԥсны акультура: актуалыртәреи аиқәырхареи" аус ауан ҩымш, цәыббра 8-9 рзы.
