АҞӘА, цәыббра 14 – Sputnik, Асҭанда Арӡынԥҳа. Аҳәынҭқарратә хортә капелла аиубилеитә концерт мҩаԥнагоит цәыббра 15 рзы Аԥснытәи аҳәынҭқарратә филармониаҟны.
1969 шықәса рзы ахортә капелла аԥҵара ареспублика амузыкатә культуразы аҵак ду зманы иҟалаз хҭысын ҳәа ҳкорреспондент илзеиҭалҳәеит Аԥсны Аҳәынҭқарра ахортә капелла адирижиор Нора Џьынџьалԥҳа.
"Аҳәынҭқарратә хортә капелла профессионалтә коллективуп. Иамоуп ахатәы ҭоурых, атрадициақәа. Ахәаԥшцәа бзиа еицырбахьеит. Аиубилеиҵәҟьа ҵыԥх акәын ианыҟаз, маҷк ҳагхеит. Акапелла аԥҵан Аҟәатәи амузыкатә училишьче аҟны иҟаз аоператә студиа шьаҭас иаҭаны. Аучилишьче адиректор Алықьса Чычба иоуп акапелла еиҿызкааз", — ҳәа азгәалҭеит Џьынџьалԥҳа.
Лара лажәақәа рыла аиубилеитә хәылԥаз апрограмма иалалоит еиуеиԥшым ашәақәа.
"Аиубилеитә программаҟны иҟалоит аклассикатә рҿиамҭа, адоуҳатә музыка, мексикатәии италиатәии ашәақәа. Амҩаԥгара ҳнаҭоит акамертә оркестр. Аконцерт ааҳартуеит Аԥсны агимн ала", — лҳәеит адирижиор.
Аҳәынҭқарратә хортә капелла аԥҵан Аҟәатәи амузыкатә училишьче аҟны иҟаз аоператә студиа шьаҭас иаҭаны, аучилишьче адиректор Алықьса Чычба ицхыраарала. Еиуеиԥшым аамҭақәа рзы иара анапхгара арҭон Ражьден Гәымба, Алықьса Чычба, Вадим Судаков, Виачеслав Аиба, Нодар Ҷанба.
1996 шықәса инаркны иахьанӡа акапелла анапхгаҩыси ирижиор хадаси дыҟоуп Аԥсны жәлар рартистка Нора Џьынџьалԥҳа.
