2013 шықәсазы раԥхьаӡа акәны Аԥсныҟа сааит Аиааира амш азгәаҭаразы. Усҟан аԥсуа тәылауаҩшәҟәы сырҭеит, уаҟа смилаҭ аубых ҳәа иануп, уи даара сгәы аладууп, лҳәеит Мераль Чарзамыӷәа.
Мераль Чазамыӷәа Аԥсныҟа дааит аҳәынҭқарратә музеи аҟны имҩаԥысуа Кавказ жәлар рмилаҭтә напҟазара ацәыргақәҵа алахәразы.
Мераль Чазамыӷәа иӡхьоу аубых бызшәаҟны еилылкаауа ажәақәеи аҳәоуқәеи ыҟоуп.
"Сара акыр шықәса аус ицызуан Тауфик Ефенди, уи аубых бызшәа здыруаз аҵыхәтәантәи уаҩын, иҿысҵааз ыҟоуп. Афранцыз Ҵарауаҩ Диумезиль Ефенди диҭаауан, аубых бызшәа иазкны ашәҟәа рҭыжьразы диҿцәажәон, аус еицыруан", — лҳәеит уи.
Мераль Чазамыӷәа агәыӷра аалырԥшит иӡхьоу аубых бызшәа аиҭашьақәыргылара, аԥсы аҭаҵара алшап ҳәа, абызшәа аҭҵаара иазку аҭҵаарадырратә усумҭақәа хархәара рзуны.
