АҞӘА, цәыббра 23, Sputnik, Бадраҟ Аҩӡба. Адепутат Кан Кәарҷиа адепутатцәа азхьеирԥшит азакәан ишазыԥхьагәанаҭо итрадициатәу аԥшьаҭыԥқәагьы рыхьчара ҳәа ааицҳаит ҳкорреспондент Апарламент аилатәараҟынтәи. Убри инадҳәаланы адепутат ҿырԥшыс иааигеит аҭыԥ змаз, аԥшьаҭыԥ иацәыхарамкәа ачарҭа-аԥацха аргылара ахҭыс.
"Ари азакәан аганахьала зҵаареи харҭәаареи ыҟам. Азакәан иҳәаақәнаҵоит аԥсабаратә ҵакырадгьылқәа рыхьчара", — иҳәеит ажәахәҟаҵаҩ, Апарламент адепутат Кан Кәарҷиа.
27-ҩык адепутатцәа еицҿакрыла ирыдыркылеит азакәан.
Ирыдыркылаз азакәан иҳәаақәнаҵоит иуникалтәу аԥсабаратә комплексқәа реиқәырхара хықәкны измоу аҳәынҭқарратә политика ашьаҭақәа.
Убри адагьы азакәан апроект еихнашоит ихьчатәу аҵакырадгьылқәа: ареспубликатәии ақалақьтәии ҵакы змоу ҳәа. Кан Кәарҷиа ишазгәеиҭаз ала ареспубликатә ҵакы змоу аҵакырадгьылқәа рганахьала Аминистрцәа Реилазаара аӡбрақәа зегьы Жәлар Реизараҟны ишьақәырӷәӷәахоит.
