Риҵатәи амилаҭтә парк аколлектив аибашьра аинвалидцәа аҳамҭа рырҭеит

© Sputnik / Саида ЖибаФото с места события.
Фото с места события. - Sputnik Аҧсны
Анапаҵаҩра
НовостиTelegram
Аиааира амш аламҭалаз Аԥсны аџьынџьтәылатә еибашьра аинвалидцәа Риҵатәи амилаҭтә парк анапхгареи аусзуҩцәеи рыхьӡала аҳамҭа рзышьҭын.

ГАГРА, цәыббра 25 — Sputnik, Саида Жьиԥҳа. Аиааира амшныҳәа аламҭалаз Риҵатәи амилаҭтә парк аколлектив Гагра иҟоу ареспубликатә агәабзиара-чаԥарҭатә центр аҟны згәабзиара шьақәзырыло аибашьра аинвалидцәа ҳамҭас ирырҭеит акондиционерқәа жәаба.

Акондиционерқәа агәабзиара-чаԥарҭатә центр ахь инеигеит Риҵатәи амилаҭтә парк аиҳабы лхаҭыԥуаҩ Лавренти Аиба. Иара ибзианы идыруеит згәабзиара шьақәзыргыло аинвалидцәа рҭагылазаашьа, избанзар, иаргьы аибашьра даинвалидуп, есышықәса араҟа игәабзиара шьақәиргылоит.

"Риҵатәи амилаҭтә парк аколлектив зегь рыхьӡала аибашьра аинвалидцәа ирыдысныҳәалоит иааиуа аиааира амш. Ирзеиӷьасшьоит агәабзиареи ақәранҵыреи! Араҟа ауадақәа рҿы хымԥада акондиционерқәа рышьақәыргылара аҭахыуп, ашықәс аамҭақәа ирықәыршәаны аинвалидцәа ахьшәашәареи аԥхарреи рхы иадырхәалоит", — ҳәа азгәеиҭеит Лавренти Аиба.

Лавренти Аиба аиааира амш рыдиныҳәалеит Аԥсныжәлар зегьы, ирзеиӷьеишьеит аилибыкаареи аҭынч ԥсҭазаареи.

Аӡиа Риҵа - Sputnik Аҧсны
Риҵатәи аҳәырԥсарра ҩажәамш рыла аа-миллионк аԥара арҳаит

Аҳамҭа зауз аибашьра аинвалидцәа рганахь агәцаракра аазырԥшыз зегьы иҭабуп ҳәа рарҳәеит.

"Ареспубликатә агәабзиара-чаԥарҭатә центр уажәшьҭа ҩнык иаҳзаҩызахеит. Ҩажәа шықәса инареиҳаны араҟа ҳгәабзиара шьақәҳаргылоит. Ҳара ҳуадақәа рҿы акондиционерқәа ыҟамызт, убри аҟнытә аӡынра афымцатә уаџьаҟқәа ҳхы иаҳархәон, аԥхынра аԥшандагақәа. Иахьарнахыс иҳауз аҳамҭа иабзоураны ахьҭеи ашоуреи ҳариааилоит. Араҟа згәабзиара шьақәзыргыло аинвалидцәа Риҵатәи амилаҭтә парк аиҳабы Рита Лолуеи аколлективи иҭабуп ҳәа раҳҳәоит. Рнапы злакыу аус аҿы еснагь ирыцзааит аманшәалара, иадныҳәалазааит аиааира амш", — рҳәеит аинвалидцәа.

Ажәабжьқәа зегьы
0