АҞӘА, жьҭаара 6 — Sputnik, Наала Аҩӡыԥҳа. Алада Ешыра иахьаҵанакуа, Верешьчагин ихәы ҳәа изышьҭоу аҭыԥқәа рҟны археологиатә експедициа имҩаԥнагоз ажрақәа раан иԥшаан хкырацәала амацәазқәа, арԥшӡагақәа, аҩнымаҭәа ҳәа ҳзааицҳаит Аԥснытәи аҳәынҭқарратә музеи адиректор, археолог Аркадии Џьапуа.
Аԥшаарақәа раан иаарԥшын имаҷымкәа, еллинтәи аамҭа иаҵанакуаз амаҭәар ҿыцқәа. Убас иԥшаан, ҳера ҟалаанӡа IV-III ашәышықәсақәа ирыҵаркуа амалҳамыркыга, антикатәи амкьаҭқәа.
Убарҭ рыдагьы, аԥҳәыс лыжырҭаҟны иаарԥшын ашәҭқәеи аԥстәқәеи рсахьаҭаԥҟа зныз анапхаҵа-мҳәырқәа. Аркадии Џьапуа ишазгәеиҭаз ала уаҟа ижыз аԥҳәыс лнацәақәа ажәабагьы амацәазқәа рхан.
Аекспедициа аус ауанаҵы иара алахәылацәа ирыԥшааит аџьаз иалхыз арԥшӡагақәа, анапхаҵақәа, аимхәыц даҷ, акерамикатә гәыгәым.
"Амал змоу ауаа цәырҵуеит иара ауаажәларратә еилазаара ахаҭа анбеиоу. Сара агәаанагара сымоуп антикатәи аамҭақәа рзы Аԥсны инхоз ауааԥсыра амал рыманы, аҿиара ҳарак змаз атәылаҟны инхон ҳәа", — азгәеиҭеит аҵарауаҩ.
Ирыԥшааз амаҭәарқәа зегьы ареставрациа иахрыжьуеит. Убри ашьҭахь асахьаҭыхыҩцәа урҭ ақьаад ахь ииаргоит.
Верешьчагин ихәы ахьыӡҵәҟьа Амжәассароуп. Еицырдыруеит асахьаҭыхыҩ Васили Верешьчагин абри аҭыԥ бзиа ибаны ишалихыз. Иара уаҟа адгьылҭыԥ ааихәеит, идумыз ӷәтәы-ҩнык иргылеит. Иаакәыршаны еиҭеиҳаит ашәырҵлақәеи атропикатә ҵаиаақәеи. Аҭыԥгьы иара ихьӡ иадырҳәало иалаган – Верешьчагин ихәы ҳәа ахьӡ цеит.
Ари аҭыԥ аԥсуа археологиаҟны иҷыдоу аҭыԥ амоуп. Абраҟоуп иахьырыԥшааз ҳера ҟалаанӡа IX-VII ашәышықәсақәа ирыҵаркуа абҩарҭәарҭа, ахҿақәеи абырзалқәеи рырҭәаразы ахаҳәтә формақәа, заатәи аџьаз аамҭа иаҵанакуа ахаҳәтә еихақәа, Маиҟәаԥтәи акультура ҳәа изышьҭо сахьала иҩычоу акерамика у.у.е.
