АҞӘА, жьҭаара 7 — Sputnik, Анжелика Бениаԥҳа. Аҩаша, жьҭаара 6 рзы Самсон Ҷанба ихьӡ зху Аԥсуа драматә театр асценаҟны Аԥсуа ҳәынҭқарратә ҿартә театр иқәнаргылеит Софа Агәмааԥҳа лавтортә скетчи Чехов ипиеса "Амшәи".
Аспектакль асиужеттә коллизиа хада азкуп зхаҵа иԥсра гәнызго аԥҳәысеиба Елена Попова лҭоурых. Лхаҵа уаанӡатәи иуалқәа бшәароуп ҳәа Елена дылҭаауеит иԥхьатәоу апоручик, адунеи ҳәсас иқәу зегьы рахь ацәымӷра змоу, ауаҩ-хжәа Григории Смирнов. Елена илҭааз ҳәаҭыхла диҿагылоит. Реимак ашьҭахь Григории Елена адуель ахь днеиԥхьоит, лара дақәшаҳаҭхоит. Елена лхымҩаԥгашьа ихнахыз Григории аԥҳәысеиба бзиа диамхабоит.
Аҿартә театр асахьаркыратә напхгаҩы, Аԥсны жәлар рартистка Софа Агәмааԥҳа иазгәалҭеит, ахәаԥшцәа аспектакль гәахәарыла ирыдыркылеит ҳәа.
"Апремиера еснагь агәыхыҭхыҭра ацуп. Агәра ганы исҳәар сылшоит апремиера қәҿиарала имҩаԥысит ҳәа", — лҳәеит Агәмааԥҳа.
Апиеса иаԥхьажәахеит Софа Агәмааԥҳа лавтортә скетч "Ахәмарцәа аауеит". Лара лажәақәа рыла, иара азкуп аԥсуа актиорцәа ссирқәа ргәалашәара.
"Автортә скетч аҟны ҳара ахәаԥшцәа идҳарбеит ҳактиорцәа изакәытә ҭагылазаашьаз аҟны аус руаз", — азгәалҭеит лара.
Аспектакль аҟны ароль хада дыхәмарит Аслан Анқәаб. Ари ароль иара истуденттә аамҭақәа рызгьы дыхәмаруан.
"Ари ароль — иуадаҩу иара убри аан аинтерес зҵоу рольуп. Абзиабара гәышьҭыхгоуп аха ари ароль аҟны абзиабареи ацәымӷреи еилоугӡароуп. Сара сзы ари апиеса ҩбаны аҽеихнашоит: актәи – уара мшәҵас, гыгшәыгҵас ухы мҩаԥугоит, аҩбатәи – амшәгьы абзиабара алшозаап", — иҳәеит Анқәаб.
Апиеса аус адырулон ҩымз инарзынаԥшуа. Апиеса аԥсшәахь еиҭалгеит Софа Агәмааԥҳа.
Аԥсуа ҿартә театр аԥҵан 2014 шықәса нанҳәа 20 рзы. Уаанӡа актиорцәа ҿарацәа хәмаруан Софа Агәмааԥҳа лтеатр "Аамҭа" аҟны.
