АҞӘА, жьҭаара 7 —Sputnik. Аԥсны ахада Рауль Ҳаџьымба Урыстәылатәи Афедерациа ахада Владимир Путин имшира инадҳәаланы адныҳәаларатә шәҟәы изишьҭит.
Адныҳәалараҟны иаҳәоит Урыстәыла ҳәынҭқаррак аҳасабала аҿаиараҟны Владимир Путин илагала акырӡа ишдуу.
"Шәара шәнапхгарала Урыстәыла аиҭаҿиара амҩа ианылеит. Адунеи аҟны уи ашәарҭадареи, аҭынчреи жәларбжьаратәи азин апринцип хадақәеи зыхьчо ҳәынҭқарраны иҟалеит. Урыстәыла ҳәынҭқаррак аҳасабала иҿыцу ахаҭабзиаратә ҩаӡара аиуит. Уи иалнаршоит амилаҭтә интересқәа хьаҳә-хьачарада рыхьчара", — аҳәоит адныҳәаларатә шәҟәаҟны.
Рауль Ҳаџьымба иара убасгьы ахә ҳаракны ишьеит Аԥсны аҿиараҟны Путин илагала ду.
"Ахә ашьара уадаҩуп шәара хаҭалатәи шәлагала Аԥсны Аҳәынҭқарра асоциал-економикатә ҿиара аизырҳараҿы. Ҳажәлар гәык-ԥсыкала ҭабуп ҳәа шәарҳәоит иааиԥмырҟьаӡакәа иҳашәҭо ахшыҩзышьҭреи ҳҿаԥхьа иқәгылоу апроблемақәа рыӡбаразы иҟашәҵо ацхыраареи рзы", — ҳәа азгәаҭоуп адныҳәалараҟны.
Урыстәылатәи Афедерациа Апрезидент Владимир Путин ихыҵит 63 шықәса.
