Кәаӡԥҳа Семаа Хьрыԥс-иԥацәа (Маршьанаа) дырҭацоуп, дынхоит Сҭамԥыл ақалақь аҿы. Лара иаҳзеиҭалҳәеит ачаҩыри аҭубари рыҟаҵашьа.
Иахьа иҟоуп имаҷымкәа иаҳхашҭуа иалагаз ажәытә аԥсуаа иҟарҵоз афатәқәа. Иаҳҳәап, ачаҩыр, аҭубар, ашәырхәа, еиуеиԥшым аҵиаақәа ирылхны иҟарҵоз ачаԥақәа уҳәа ирлас-ырласны аԥсуаа рчысхкқәа рҿы иуԥымло. Иаҳҳәозар ачаҩыр, аҭубар реиԥш иҟоу афатәқәа ҳдиаспораҿы инхо ҳауаажәларгьы макьана иҟоуп иҟазҵо, издыруа.
Иахьа аԥсуа чыс агьама убар ахьулшо акрыфарҭақәа рҿгьы арҭ ачысқәа уԥылаӡом. Арҭ заҟа ҳаԥсҭазаара иацәыӡуа аҟара ҳмилаҭ культурагьы иаиуеит ацәыӡ. Аха макьана арҭ ачысхкқәа еиқәҳархартә еиԥш аҭагылазаашьа ҳамоуп, избанзар аиҳабыратә абиԥара рыҩныҵҟа имаҷымкәа иуԥылоит урҭ рыҟаҵашьа здыруа ауаа. Абра ҳара ишәзеиҭаҳҳәоит ачаҩыри аҭубари рыҟаҵашьа. Арҭ ачысқәа егьырҭ аԥсуа чысқәа зегь реиԥш ауаҩы игәабзиара иаԥырхагаӡам, насгьы арҭ есыҽны ирымфоз фатәқәоуп.
