АҞӘА, абҵара 22 – Sputnik, Роберт Џьапуа. Аԥсны Ахада ахәшьара ҳаракы аҭаны иазгәеиҭеит Аԥсны иҟоу Жәларбжьаратәи Аџьар ҟаԥшь акомитет ареспубликазы имҩаԥнагаз аусура, ҳтәылаҟны зусура хзыркәшо амиссиа аиҳабы Џьорџь Дрндарски хазы ҭабуп ҳәа еиҳәеит.
"Иҭабуп ҳҳәынҭқарразы хра зманы иҟаз шәусуразы. Иумбарц залшом шәусура алҵшәақәа. Ҳара ҳзы акраҵанакуеит шәара ишәымоу аԥышәа ду. Уи аԥышәа рымажәдоит ҳара ҳаилазаарақәа. Аилазаарақәа реидҳәалара, реинырра ҳара ҳзы ахәшьара ду амоуп", — иҳәеит атәыла Ахада.
Џьорџь Дрндарскигьы ҭабуп ҳәа еиҳәеит Аԥсны Ахада иҟаиҵоз ацхырааразы.
"Иҟоу ааҭагылазаашьа схы иархәаны, ҭабуп ҳәа шәасҳәар сҭахуп ҳаиҿкаарахь ишәымаз аҳаҭыр азы, иҳадыжәгалоз ацхыраара ду азы. Иахьазы аус зуа апрограммақәа зегьы аус шыруц ирулоит. Сара агәра згоит аԥснытәи амчрақәа ԥхьаҟагьы адгылара шыҟарҵало МКККА имҩаԥнаго ауснагӡатәқәа рҟны", — иҳәеит Дрндарски.
Џьорџь Дрндарски Аԥсны иҟоу МКККА амиссиа напхгара аиҭон 2013 шықәса инаркны. Аиҿкаара Аԥсны аусура иалагеит аибашьра аамҭақәа рзы. Иахьазы МКККА аколлектив жәибыжьҩык рыла ишьақәгылоуп. Дара ԥхьаҟагьы русура мҩаԥыргалоит атәылеи ажәлари ирыхәартә еиԥш.
