АҞӘА, ԥхынҷкәын 11 — Sputnik. Драндатәи абахҭаҟынтә ибналаз ацәгьауаҩ Бачуки Латариа Шаумиановка ақыҭаҟны дааныркылеит ҳәа аанацҳауеит Аԥсны Аҩныҵҟатәи аусқәа рминистрра аофициалтә саит.
Абналаҩ иаанкылара напхгара аиҭон Аԥсны Аҩныҵҟатәи аусқәа рминистр Леонид Ӡаԥшьба.
"Абахҭаҟынтәи ибналаз Бачуки Латариа иаанкылара алыршахеит аиҽкаара бзиа змаз аусура иалҵшәаны. Иара даанкылан ԥхынҷкәын 10, 17:45 рзы, ақыҭа Шаумиановка иаҵанакуа абнаратә массив аҟны", ҳәа аанацҳауеит Аԥсны Аҩныҵҟатәи аусқәа рминистрра аофициалтә саит.
Ацәгьауаҩ ишьҭан Аԥсны Аҩныҵҟатәи аусқәа рминистрреи Аԥсны Ашәарҭадаратә маҵзура русзуҩцәеи.
"Аминистр ҭабуп ҳәа реиҳәеит ауснагӡатә ҷыда иалахәыз зегьы. Гәылрыԥшьтәи РОВД аиҳабы инапынҵақәа назгӡо Асҭамыр Ҳагәышь иааирԥшыз апрофессионализм азы изаамҭанытәим амилициатә чын – аподполковник, ианашьахеит", ҳәа азгәаҭоуп Аԥсны Аҩныҵҟатәи аусқәа рминистрра аофициалтә саит.
Бачуки Латариа 2014 шықәса раахыс дҭакуп (ААК ахәҭаҷ 119, ахәҭа 2). Ашьауӷатә кодекс ахәҭаҷ (абџьар ахархәарала ауаҩы имҵарсра) иазыԥхьагәанаҭоит 12 шықәса рҟынӡа ахақәиҭра алхәдаатәра.
Бачуки Латариа абахҭаҟынтәи дыбналеит ԥхынҷкәын 10 рзы, ашьыжь.
