АҞӘА, ԥхынҷкәын 18 — Sputnik, Бадраҟ Аҩӡба. Ахаша, ԥхынҷкәын 16 рзы имҩаԥысыз Жәларбжьаратәи афорум "Евразитәи аинтеграциатә процессқәа рконтекст ала Аԥсны аҿиара астратегиа" аихшьаалақәа ирызкыз апресс-конференциаҟны Аԥсны Аԥыза-министр Артур Амқәаб иҳәеит урыстәылатәи аԥсыӡкцәа ҳамшын аҿы аԥсыӡкра рыдаагалеит ҳәа.
"Ҳара иаҳгәаԥхом Урыстәылеи Ҭырқәтәылеи рыбжьара иҟоу аҭагылазаашьа, аха анырра аҳҭартә еиԥш алшара ҳамам", — иҳәеит Аԥыза-министр.
Иара убасгьы иаҵишьит ари аӡбара Аԥсны аекономика иацхраар шалшо.
Аԥыза-министр агәыӷра имоуп арҭ аҩ-ҳәынҭқаррак рыбжьара аҭагылазаашьа ҭышәынтәалап ҳәа.
"Сара сгәыӷуеит Ҭырқәтәыла анапхгара иҟарҵаз шыгхоу еилыркаап ҳәа", — ациҵеит Амқәаб.
2025 шықәсанӡа Аԥсны Аҳәынҭқарра асоциал-економикатә ҿиара астратегиа х-етапкны аус аулоит. Аконцепциа иҳәаақәнаҵараны иҟоуп асоциал-економикатә усхк аҟны азҵаарақәа рыӡбразы аҳәынҭқарратә политика ахырхарҭа хадақәа.
